Search

ሜጀር ጀኔራል ክንፈ ዳኘውን ጨምሮ 11 ተከሳሾች በተከሰሱበት የሪቬራና ኢምፔሪያል ሆቴል ግዥ ፍርድ ቤቱ የምስክሮችን ቃል መስማት ጀመረ


17/6/2019

ፍርድ ቤቱ ዐቃቤ ሕግ በማስረጃነት ያቀረባቸውን ምስክሮች መስማት የጀመረው በትናንትናው እለት ሲሆን ሂደቱ ዛሬም ቀጥሎ ውሏል፣ የምስክሮችን ቃል የማድመጥና ማስረጃዎችን የመመርመር ሂደቱ ለ10 ተከታታይ ቀናት የሚቆይ መሆኑም ታውቋል፡፡

 

ተከሳሾች ሜ/ጀኔራል ክንፈ ዳኘው፣ ኮረኔል በርሀ ወ/ሚካኤል፣ ኮረኔል ሙሉ ወ/ገብርኤል፣ ብ/ጀኔራል ብርሃነ በየነ፣ ሌ/ኮረኔል ስለሺ ቤዛ፣ ሲሳይ ገ/መስቀል፣ ዓለም ፍፁም፣ ሌ/ኮረኔል አስምረት ኪዳነ አብርሃ፣ ሌ/ኮረኔል ግርማ መንዘርጊያ፣ ሻለቃ አግዘው አልታየ እና አቶ ኤርሚያስ ጠቅል አመልጋ ሲሆኑ ከሪቬራና ኢምፔሪያል ሆቴል ግዥ ጋር በተያያዘ ክስ የተመሰረተባቸው መሆኑ ይታወቃል፡፡

 

ተከሳሾች የብረታ ብረትና ኢንጅነሪንግ ኮርፖሬሽን ያለበትን የእንግዳ መቀበያና ማረፊያ ሆቴል እጥረት ለማቃለል በሚል አላስፈላጊ የሆነ ግዥ በመፈጸም፣ ከሪቬራ ሆቴልና የፒሲቪ ፕሮፋይል ፋብሪካ ጋር በተገናኘ 415,222,069 ብር በመንግስትና በህዝብ ላይ ጉዳት በማድረስ እንዲሁም ከኢምፔሪያል ሆቴል ግዥ ጋር በተገናኘ ያላግባብ 21,000,000 ብር በመንግስትና በህዝብ ላይ ጉዳት በማድረስ የሙስና ወንጀል መከሰሳቸው ይታወሳል፡፡

 

የፌዴራሉ ከፍተኛ ፍርድ ቤት ልደታ ምድብ 15ኛ የወንጀል ችሎት ተከሳሽ ኮረኔል በርሀ ወ/ሚካኤል፣ ሌ/ኮረኔል ስለሺ በዛ እንዲሁም ወ/ሮ ሲሳይ ገ/መስቀል በሌሉበት የምስክሮችን ቃል የማድመጥና ማስረጃዎችን የመመርመር ሂደት እያከናወነ ይገኛል፡፡


  • 64787102_2311761102251294_5683245440695271424_n.jpg