Search

በእነ አብዲ ሙሀመድ ኡመር የክስ መዝገብ ላይ ዐቃቤ ሕግ የሶስት ተከሳሾችን ክስ አሻሻለ


18/6/2019

በእነ አብዲ ሙሀመድ ኡመር የክስ መዝገብ ተጠርጥረው ማረሚያ ቤት የሚገኙ ተከሳሽ አብዲ ኑር መሀመድ፣ተከሳሽ ሀኒ ሀሰን አህመድ እና ተከሳሽ ሻምበል ሀይዲድ በደል ላይ ዐቃቤ ሕግ ክስ አሻሻለ፡፡

 

ዐቃቤ ሕግ የሶስቱን ተከሳሾች ክስ ያሻሻለው በሰኔ 07 ቀን 2011 ዓ.ም ባስቻለው ችሎት 22ኛ ተከሳሽ አብዲ ኑር መሀመድ እና 43ኛ ተከሳሽ ሀኒ ሀሰን አህመድ ማንነታቸውን የሚገልፅ ማስረጃ በችሎት በማቅረባቸውና 46ኛ ተከሳሽ ሻምበል ሀይዲድ በደል ማንነታቸውን የሚገልፅ ማስረጃ ለፌዴራል ፖሊስ እንዲያቀርቡና ዐቃቤ ሕግ ክሱን እንዲያሻሽል ፍርድ ቤቱ በማዘዙ ነው፡፡

 

ዐቃቤ ሕግ የ22ኛ ተከሳሽ አብዲ ኑር መሀመድ አህመድ ክስ አብዲኑር መሀመድ የሱፍ በማለት ያሻሻለ ሲሆን የ43ኛ ተከሳሽ የሀኒ ሀሰን አህመድን ክስ ዘምዘም ሀሰን አህመድ በማለት አሻሽሏል በተመሳሳይ የ46ኛ ተከሳሽ ሻምበል አይዲድ በደልን ክስ ኢንስፔክተር አይዲድ ራጊ አብዲ በማለት ማሻሻሉን ከችሎቱ ለመረዳት ተችሏል፡፡

 

በሌላ በኩል የፌዴራል ፖሊስ የ25ኛ ተከሳሽ ከድር አብዲ ማንነት አጣርቶ እንዲያቀርብ የታዘዘ ቢሆንም ዐቃቤ ሕግ ተከሳሹን የማይፈልገው መሆኑን ለችሎቱ በማስረዳት ጉዳዩንም ለፌዴራል ፖሊስ ማሳወቁን ከችሎቱ ለመረዳት ተችሏል፡፡

 

የፌዴራሉ ከፍተኛ ፍርድ ቤት ልደታ ምድብ 4ኛ የወንጀል ችሎት ዛሬ ባስቻለው ችሎት የ22ኛ፣ 35ኛ፣ 43ኛ ና 46ኛ ተከሳሾች ክስ በችሎት ያነበበ ሲሆን ለ35ኛ ተከሳሽ ተከላካይ ጠበቃ እንዲቆምላቸው አዟል፡፡

 

በተጨማሪም ፍርድ ቤቱ 25ኛ ተከሳሽ እንዲለቀቅ በማዘዝ 22ኛ፣ 35ኛ፣ 43ኛ እና 46ኛ ተከሳሾች መቃሚያ ካላቸው ከሐምሌ 11 በፊት ለችሎት እንዲያቀርቡ ትዕዛዝ የሰጠ ሲሆን የእነ አብዲ ሙሀመድ ኡመር የክስ መቃወሚያ ላይ ብይን ለመስጠት ፍርድ ቤቱ በያዘው ሐምሌ 11 ቀን 2011 ዓ.ም ቀጠሮ በሚያቀርቡት መቃሚያ ላይ ብይን እንደሚሰጥ ከችሎት ለመረዳት ተችሏል፡፡


  • 64787102_2311761102251294_5683245440695271424_n.jpg