Search

በብሔራዊ የፍልሰት አስተዳደር ፖሊሲ ዝግጅት ዙሪያ ምክክር ተካሄደ


19/7/2019

ከፍልሰት ጋር በተያያዘ የሚታዩ አሉታዊ ተጽዕኖችን በመቀንስ የሚገኙ ሁለንተናዊ ጥቅሞችን ማስፋት ይቻል ዘንድ ብሔራዊ የፍልሰት አስተዳደር ፖሊሲ አዘጋጅቶ ጥቅም ላይ ማዋል እንደሚያስፈልግ ተገለጸ፡፡

 

በኢፌዴሪ ጠቅላይ ዐቃቤ ሕግ ጸረ ህገ-ወጥ የሰዎች ዝውውር ግበረ ኃይል ጽ/ቤት አዘጋጅነት ከህገ-ወጥ ፍልሰት ጋር ተያይዞ የሚስተዋሉ አሉታዊ ተጽዕኖችን በመቀንስ ህጋዊ ፍልሰት የሚያስገኛቸውን አውንታዊ ፋይዳዎች መጠቀም እንዲያስችል ከአለም አቀፍ ተሞክሮዎች ልምድ በመቅሰም ለበጎ ዓላማ ማዋል ይቻል ዘንደ በብሔራዊ የፍለሰት አስተዳደር ፖሊሲ አዘገጃጀትና ትኩረት በሚያሰፈልጋቸው ሌሎች ጉዳዮች ዙሪያ ከሚኒስቴር መስርያ ቤቶችና ከተለያዩ የፌዴራል ተቋማት ከተወጣጡ ከፍተኛ የሥራ ኃላፊዎች፣ ከአለማቀፉ የፍልሰተኞች ድርጅት IOM እንዲሁም ከተለያዩ ዩኒቨርሲቲዎች የተጋበዙ አመራሮች ጋር ውይይት ተካሂዷል፡፡

 

በውይይት መድረኩ ተገኝተው ንግግር ያደረጉት የኢፌዴሪ ም/ጠቅላይ ዐቃቤ ሕግ ዶ/ር ጌዲዮን ጠሞቲዎስ ፍልሰት የሚያመጣውን አሉታዊ ተጽኖ ለመከላከልና ለመቀንስ ሕግ አውጥቶ እየተሰራ እንዳለው ሁሉ የሚስገኘውን አውንታዊ ተጽዕኖ ከአለም አቀፍ ተሞክሮዎች ጋር ቀምሮ መጠቀም ያስችል ዘንድ ብሔራዊ የፍለሰት አስተዳደር ፖሊሲ ሊዘጋጅ ይገባል በማለት ተናግረዋል፡፡

 

በሌላ በኩል ከአለም አቀፉ የፍልሰተኞች ድርጅት IOM የተጋበዙ የስራ ኃላፊዎች ባደረጉት ገለፃ በሀገር ውስጥም ሆነ ድንበር በመሻገር ደረጃ በሚደረጉ የፍለሰት ሂደቶች ያሉ ጉዳቶችን በመከላከል በጎ የሆኑ ውጤቶችን ማለትም ከዘርፉ የሚገኘውን የኢኮኖሚ ፍሰት፣ ሶሻል ካፒታል እንዲሁም ሌሎች የኢንቨስትመንት እድሎችን መጠቀም ይቻል ዘንደ ግልጽ የሆነ ብሔራዊ የፍልሰት አስተዳደር ፖሊሲ ቀርፆ ጥቅም ላይ ማዋል ለሀገርም ሆነ ለዜጎች ያለው ፋይዳ ትልቅ ነው ብለዋል፡፡

 

በውይይቱ ተሳታፊ የሆኑ አካላት በበኩላቸው የፖሊሲው አስፈላጊነት የማያጠያይቅ መሆኑን ገልጸው ፖሊሲው ሲዘጋጅ አለም አቀፍ ይዘት ያላቸውን ተሞክሮዎች በመቀመር በተጠናና የሀገሪቱን ነባራዊ ሁኔታ ባገናዘበ መልኩ ተዘጋጅቶ በፍጥነት ተግባራዊ ሊደረግ ይገባል ብለዋል፡፡


  • D_1ZyV6WwAER6Fb.jpg 
  • 2.jpg