Search

ተቀጥሮ በሚሰራበት ሱቅ ውስጥ የዕምነት ማጉደል ወንጀል የፈፀመው ተከሳሽ በእስራት ተቀጣ



ተከሳሽ ከንዙ አራጋው ሀቢብ በአዲስ ከተማ ክፍለ ከተማ ቀበሌ 01/02/03 ልዩ ቦታው መርካቶ ዕጣን ተራ ተብሎ ከሚጠራው አካባቢ መጋቢት ወር 2008 ዓ.ም ቀንና ሰዓቱ በውል ባልታወቀ ጊዜ በ1996 ዓ.ም የወጣውን የወንጀል ህግ አንቀፅ 676/2/ሀ/ ላይ የተመለከተውን ድንጋጌ በመተላለፍ ዐቃቤ ህግ ክስ መስርቶበታል።

 

ተከሳሽ የማይገባውን ብልፅግና ለማግኘት ወይንም ለሌላ ሰው ለማስገኘት በማሰብ የግል ተበዳይ ወ/ሮ ለይላ አብደላ በተባሉት ሱቅ ውስጥ በሰራተኝነት ተቀጥሮ እያገለገለ ሳለ በስራው ምክንያት በእጁ ገብቶ የነበረውን የዋጋ ግምቱ 17000 (አስራ ሰባት ሺህ) ብር የሚያወጣ አስራ ሰባት ኬሻ ፌስታል ለግል ጥቅሙ ያዋለ ስለሆነ በፈፀመው ከባድ የእምነት ማጉደል ወንጀል ተከሶ በህግ ጥላ ስር እንደዋለ የወንጀል ዝርዝር ሁኔታው ያስረዳል፡፡

ከሳሽ የፌደራል ዐቃቤ ህግ በበኩሉ የተከሳሽን ጥፋተኝነት ለፍርድ ቤቱ ያስረዳልኛል ያላቸውን አራት የሰው ምስክሮችን ለፍርድ ቤቱ አቅርቦ የምስክርነት ቃላቸውን  በማሰማቱ ፍርድ ቤቱ ተከሳሽን ጥፋተኛ ነህ ብሎታል።

የፌደራሉ የመጀመሪያ ደረጃ ፍርድ ቤት አዲስ ከተማ ምድብ ወንጀል ችሎት ተከሳሽ ክሱን እንዲከላከል ጠይቋል፡፡ ተከሳሽም “እኔ ወንጀሉን አልፈፀምኩም በተመሰረተብኝ ክስም ጥፋተኛ አይደለሁም ” ሲል የእምነት ክህደት ቃሉን ለፍርድ ቤቱ ሰቷል፡፡

 

ፍርድ ቤቱ የቀረበለትን የሰውና የሰነድ ማስረጃ መርምሮ በተከሳሽ ላይ የቅጣት ውሳኔ አስተላልፏል ።

ተከሳሽ ጥፋተኛ የተባለበትን ድንጋጌ በደረጃ 5 የእስራት ዕርከን 22 ላይ በማሳረፍ መነሻ ቅጣት 5 ዓመት ተይዞ ማቅለያ ሳይቀርብ ተከሳሽ ከዚህ በፊት ሪከርድ ያለበት መሆኑ አንድ ማክበጃ ተይዞ የእስራት እርከኑን ከእርከን 22 ወደ እርከን 23 ከፍ በማድረግ ተከሳሽ በፈጸመው ከባድ የዕምነት ማጉደል ወንጀል ጥር 02 ቀን 2010 ዓ.ም በዋለው ችሎት በ6 ዓመት ፅኑ እስራት እንዲቀጣ ወስኖበታል።

 

 


  • logo.jpg