Search

የሰው ዕቃ ተሸክሞ የተሰወረው ግለሰብ በእስራት ተቀጣ።

Published: 2 years 3 days ago

ተከሳሽ መሃመድ ከድር ጀማል በአዲስ ከተማ ክፍለ ከተማ ወረዳ 10 ቀበሌ 05 ክልል ልዩ ቦታው ለምለም አዳራሽ ተብሎ ከሚጠራው አካባቢ ታህሳስ 02 ቀን 2010 ዓ.ም ከጠዋቱ 4፡00 ሰዓት ሲሆን በ1996 ዓ.ም የወጣውን የወንጀል ህግ አንቀፅ 669/2/ሐ ስር የተመለከተውን ድንጋጌ በመተላለፍ ወንጀል በዐቃቤ ህግ ክስ መስርቶበታል፡፡   

ተከሳሽ ወንጀሉን የፈጸመው የማይገባውን ብልፅግና ለማግኘት በማሰብ  የግል ተበዳይ ምትኩ ፍቃዱ ንብረት የሆነውን የልብስ ስፌት ማሽን ወይም ኢንተር ሉክ የዋጋ ግምቱ 12000 (አስራ ሁለት ሺህ) ብር የሚገመት ንብረት ተሸክሞ ወደ መካኒክ ለመውሰድ ከተስማማ በኋላ በመሀል ዕቃውን ይዞ ታህሳስ 02 ቀን 2010 ዓ.ም የተሰወረ ሲሆን የወሰደውን ዕቃ ታህሳስ 04/2010 ዓ.ም ከቀኑ በ10፡30 በኮልፌ ቀራኒዮ ክፍለ ከተማ ወረዳ 08 ቀበሌ 07 ልዩ ቦታው ጋሞ ግሮሰሪ ተብሎ ከሚጠራው አካባቢ ዕቃውን ለመሸጥ ሲሞክር የተያዘ በመሆኑ በፈፀመው ከባድ የስርቆት ወንጀል ተከሶ በህግ ጥላ ስር እንደዋለ የወንጀል ዝርዝር ሁኔታ ያስረዳል፡፡

ከሳሽ የፌዴራል ጠቅላይ ዐቃቤ ህግ በበኩሉ የተከሳሽን ጥፋተኝነት ለፍርድ ቤቱ ያስረዳልኛል ያላቸውን አምስት የሰው ምስክሮች እንዲሁም የሰነድና የልብስ መስፊያ ማሽኑን በኢግዚቪትነት ተይዞ እንደሚገኝ ለፍርድ ቤቱ ያቀረበ ሲሆን ፍርድ ቤቱ ተከሳሽ በፈጸመው ወንጀል ጥፋተኛ ብሎታል።

 

የፌደራሉ የመጀመሪያ ደረጃ ፍርድ ቤት አዲስ ከተማ 3ኛ ምድብ ወንጀል ችሎት ተከሳሹ የተመሰረተበትን ክስ እንዲከላከል አድርጓል “ተበዳይ ተሸክሜ ላደርስለትና ሊከፍለኝ ከተስማማን በኋላ ከሰው ብዛት የተነሳ ከተበዳይ ጋር ተጠፋፋን  እኔም ተበዳይን በወቅቱ ማግኘት ስላልቻለኩ  እቃውን ለመሸጥ ስደራደር አግኝቶኝ ነው በፖሊስ ያስያዝኝ ”  ሲል የእምነት ክህደት ቃሉን ለፍርድ ቤቱ ሰቷል፡፡ ፍርድ ቤቱም ተከሳሽ በፈጸመው  ከባድ የስርቆት ወንጀል ታህሳስ 20/2010 ዓ.ም በዋለው ችሎት ተከሳሹ በ 5 ዓመት ፅኑ እስራት እንዲቀጣ ወስኖበታል ።

 

ከባድ የስርቆት ወንጀል የፈጸመው ግለሰብ በጽኑ እስራት ተቀጣ

ተከሳሽ አብዱላዚዝ ደበላ ሁሴን በአዲስ ከተማ ክፍለ ከተማ ወረዳ 03 ቀበሌ 10/11/12 አውቶብስ ተራ ፊት ለፊት አየለ ሆቴል አካባቢ ህዳር 12/2010 ዓ.ም በግምት ከጠዋቱ 4፡00 ሰዓት ሲሆን በ1996 ዓ.ም የወጣውን የወንጀል ህግ አንቀፅ 669/2/ሐ ላይ የተመለከተውን ድንጋጌ በመተላለፍ ፍርድ ቤት ተከሶ ቀርቧል፡፡

ተከሳሽ የማይገባውን ብልፅግና ለማግኘት ወይም ለሌላ ሰው ለማስገኘት በማሰብ የግል ተበዳይ ሸምሱ ሸሪፍ አደም ንብረት የሆነ የወንድና የሴት የተለያዩ አልባሳትን የዋጋ ግምታቸው 26360 (ሃያ ስድስት ሺህ ሶስት መቶ ስልሳ) ብር የሚያወጣ ንብረት ተሸክሞ ትንሹ አውቶብስ ተራ ለማድረስ በ15 ብር ተስማምተው በመሄድ ላይ እያሉ ተከሳሽ መንገድ በመቀየር ለማምከለጥ ሲሞክር እጅ ከፍንጅ የተያዘ በመሆኑ በፈፀመው ከባድ የስርቆት ወንጀል ተከሶ በህግ ጥላ ስር እንደዋለ የወንጀል ዝርዝር ሁኔታ ያስረዳል፡፡

 

ከሳሽ የፌዴራል ጠቅላይ ዐቃቤ ህግ በበኩሉ የተከሳሽን ጥፋተኝነት ለፍርድ ቤቱ ያስረዳልኛል ያላቸውን የሰው እና የተለያዩ የወንድና የሴት አልባሳት በኢግዚቪትነት በፖሊስ ጣቢያ ተይዘው እንደሚገኙ በማቅረቡ ፍርድ ቤቱ ተከሳሽን ጥፋተኛ ነህ ብሎታል ። የፌደራሉ የመጀመሪያ ደረጃ ፍርድ ቤት አዲስ ከተማ 3ኛ ምድብ ወንጀል ችሎት ተከሳሹ ክሱን እንዲከላከል ሲጠይቀው “ እኔ በተመሰረተብኝ ክስ ጥፋተኛ  አይደለሁም ድርጊቱን አልፈፀምኩም ”  ሲል ለፍርድ ቤቱ የእምነት ክህደት ቃሉን ሰቷል፡፡ 

 

ፍርድ ቤቱም የግራ ቀኙን ክርክር ካደመጠ በኋላ ተከሳሹ የፈጸመውን ወንጀል በደረጃ 5 የእስራት እርከን 22 ላይ በማሳረፍ ማቅለያ ሳይቀርብ ተከሳሹ  ከዚህ በፊት ሪከርድ ያለበት በመሆኑ የእስራት እርከኑን ከ22 ወደ 23 ከፍ በማድረግ ታህሳስ 20 ቀን 2010 ዓ.ም በዋለው ችሎት ተከሳሹ በ6 ዓመት ፅኑ እስራት እንዲቀጣ ወስኖበታል፡፡


###