Search

በሰዎች መነገድና ህገ ወጥ በሆነ መንገድ ድምበር የማሻገር ወንጀልን ለመከላከል እየተደረገ ያለው የምክክር መድረክ ዛሬም ቀጥሎ ውሏል


22/2/2019

በዛሬው የውይይት መድረክ ውሎ በተለይ አዋጁን መሠረት አድርጎ በተቀረፀው የፌዴራል ህገ-ውጥ የሰዎች ዝውውር ተከላካይ ግብረ ኃይል ስትራቴጂክ ዕቅድ ትግበራ በሁለት ዓመት ከስድስት ወር የአፈፃፀም ወቅት የታዩ ጠንካራና ደካማ ጎኖችን በጥልቀት የማየት በቀሪ ጊዜያት የታዩ ክፍተቶችን በማስተካከል ውጤታማ ሥራ መስራት እንደሚያስፈልግ ታይቷል፡፡

በተደረገው የአፈፃፀም ግምገማ ወቅትም ችግሩ የለበት ደረጃ ለይቶ በቀሪው የሁለት ዓመት ከስድስት ወር ጊዜ ትኩረት የሚሰጥባቸውን አበይት ተግባራት ዙሪያ አፅንኦት በመስጠት ምክክር ተደርጎበታል፡፡

በዚህም ወንጀሉ እያስከተለ ባላው ሁለንተናዊ ጉዳት ዙሪያ ጥናት የሚካሄደ ሲሆን ጉዳቱ በግለሰብ፣ በቤተሰብ፣ በማህበረሰብ፣ በአካባቢና በሀገር ደረጃ እያደረሰ ያለው ትፅዕኖ በስፋት ይደሰሳል፣ ተጎጂዎችን መልሶ የማቋቋምና ሰፋ ያለ የግንዛቤ የማስጨበጫ ተግባራትም ይከናወናሉ ተብሏል፡፡

በሌላ በኩልም በሰዎች መነገድና ህገ-ወጥ በሆነ መንገድ ድምበር የማሻገር ወንጀል በሰፋት የሚስተዋልባቸው መነሻ አከባቢዎችና መውጫ መስመሮች እንዲሁም መተላለፊያና መዳረሻ ሀገራት ተለይተው የታወቀ መሆኑ ተገልጾ በተለይ በመውጫ መሰመሮች አከባቢ ጥብቅ ቁጥጥር እንደሚደረግ ተጠቁሟል፡፡

ወንጀሉን በመከላከልና በመቆጣጠር ተግባር ወቅት የታዩ ጠንካራና ደካማ ጎኖችን የመለየት እንዲሁም የማስተካከያ እርምጃ የመውሰድ፣ በሌላ በኩል በግብረ ኃይሉ አፈፃፀም ወቅት የታዩ ምርጥ ተሞክሮዎችን በመጠቀም ለችግሩ እልባት የመስጠት እርምጃም ተግባራዊ ይደረጋል ተብሏል፡፡

የችግሩ አሳሳቢነትና ስፋት እንዳለ ሆኖ የኢ.ፌ.ዴ.ሪ ጠቅላይ ዐቃቤ ሕግ በአዋጅ ቁጥር 909/2007 መሰረት በተሰጠው ሥልጣንና ተግባር በስሩ በተዋቀረው የፀረ ህገ-ወጥ የሰዎች ዝውውር ጽ/ቤት አማካኝነት ወንጀሉን በመከላከልና በመቆጣጠር እንዲሁም ግብረ ኃይልን በመምራትና በማስተባበር ረገድ አበረታች ውጤት ማስመዝገቡም በውይይቱ ተጠቅሷል፡፡

በሌላ በኩል የኦሮሚያ፣ የትግራይ፣የአማራና የደቡብ ክልል ህገ-ውጥ የሰዎች ዝውውር ተከላካይ ግብረ ኃይል የስድስት ወር አፈፃፀም ሪፖርት ቀርቦ ወይይት የተደረገበት ሲሆን በመድረኩ ከሚኒስቴር መስርያ ቤቶች፣ ከክልላዊ አሰተዳደሮች፣ ከሐይማኖት ተቋማት፣ ከሀገር በቀልና አለም አቀፍ መንግስትዊ ያልሆኑ ድርጅቶች፣ ከህዝብ ተወካዮችና የፌደረሽን ምክር ቤት አባላት፣ ከሚዲያ አካላት፣ ከሴቶችና ወጣቶች ፌዴሬሽኖች፣ ከሰራተኛ ማህበራት ኮንፌዴሬሽን እንዲሁም ከስደት ተመላሾች የተወከሉ 47 የግብረ ኃይሉ አባላት ተሳታፊ መሆናቸው ታውቋል፡፡


  • 52777665_2127384850688921_8198137019445018624_n.jpg 
  • 52920234_2127384730688933_2619521367241916416_n.jpg 
  • 53147918_2127384684022271_3660940109185810432_n.jpg