Search

የኢፌዲሪ ጠቅላይ ዐቃቤ ሕግ አመራሮች ወርሃዊ መደበኛ ስብሰባቸውን አካሄዱ


25/3/2019

በኢፌዲሪ ጠቅላይ ዐቃቤ ሕግ በሚከናወኑ ተግባራትና እየተመዘገቡ ባሉ ውጤቶች ዙሪያ የተቋሙ ከፍተኛና መካከለኛ አመራሮች ውይይት አካሄዱ ፡፡ 

 

 

የመድረኩ ዋና አላማ የፍትህ ሥርዓቱን ውጤታማ በማድረግ በሚመዘገበው የላቀ አፈፃፀም የህብረተሰቡን ተሳታፊነትና ተጠቃሚነት ማረጋገጥ እንደሆነም ታውቋል፡፡

 

 

በመድረኩም በሀገሪቱ ፍትህን ለማረጋገጥ እየተደረጉ ያሉ እንቅስቃሴዎችን በተመለከተ ማለትም የዜጎችን ዴሞክራሲያዊና ሰብአዊ መብቶች ከማክበርና ከማስከበር አንፃር የተከናወኑ ተግባራትንና በዐቃቤ ሕግ፣ በፖሊስና በፍርድ ቤቶች መካከል ያለውን ቅንጅታዊ አስራር እንዲሁም የሕግ የበላይነትን ከማስጠበቅ አኳያ በዕቅድ ተይዘው የተከናወኑ ተግባራት ተገምግመዋል፡፡

 

 

በግምገማው መሰረትም በክስ መዛግብት የምርመራና የክርክር ሂደት እየታዩ ያሉ ጠንካራና ደካማ ጎኖች ላይ አፅኖት በመስጠት ውይይት ተደርጎባቸዋል፡፡ በዚህም ተቋሙ ከጊዜ ወደ ጊዜ መሻሻሎችን እያሳየና አመርቂ ውጤቶችን እያስመዘገበ የመጣ ቢሆንም አሁንም አልፎ አልፎ በሚመሰረቱ አንዳንድ የክስ መዝገቦች ላይ ምስክሮችን በበቂ ሁኔታ ይዞ አለመገኘትና መረጃዎችን በሚፈለገው ደረጃ አደራጅቶ ያለማቅረብ ችግሮች መስተዋላቸው ታይቷል፡፡

 

 

ከወንጀል ምርመራ ጋር በተያያዘም ምርመራዎችን የሚያካሄዱ ዐቃቤያነ ሕጎች ቁጥር በሚፈለገው ደረጃ ባለመሆኑ የምርመራ ሂደቶች ረጅም ጊዜያትን እንዲወስዱ በር የከፈተ ከመሆኑም በላይ እየተመሰረቱ ባሉ የክስ መዝገቦች ላይም ተገማች ውሳኔዎችን በፍጥነት ማሰጠት እየተቻለ እንዳልሆነም በመድረኩ ተነስቷል፡፡

 

 

ሆኖም ግን በዐቃቤ ሕግና በፖሊስ መካከል ተደጋግፎ የመስራት ሂደት እየተሻሻለ የመጣ በመሆኑ የጥፋተኝነት ሁኔታ በተረጋገጠባቸው በርካታ መዝገቦች ላይ የፍርድ ዉሳኔ እንዲሰጥባቸው መደረጉ ተገልጿል፡፡

 

 

ብሔራዊ የሰብዓዊ መብት የድርጊት መርሃ ግብር እንቀስቃሴም በመድረኩ የተገመገም ሲሆን የሰብአዊ መብቶች ጥበቃና ክትትል ተግባራት እቅድና ሪፖርት ላይ በመላው ሀገሪቱ ክትትል ለማድረግ ሰፊ ጥረት ተደርጓል፡፡ በዚህም መረሃ ግብሩን ለሚያከናውኑ ዐቃቤያነ ሕጎች ሥልጠና ተሰጥቷል ተብሏል፡፡

 

 

በፖሊስ ጣቢያና በማረሚያ ቤቶች የሰብዓዊ መብት አያያዞችን ለመከታተል እቅድ የተያዘ በመሆኑ ከኢፌዲሪ ጠቅላይ ዐቃቤ ሕግ፣ ከፌዴራልና አ/አበባ ፖሊስ ኮሚሽን፣ ከድሬደዋ ፖሊስ ኮሚሽን እና ከፌዴራል ማረሚያ ቤቶች አስተዳደር ከተወጣጡ አመራሮች ጋር በሰብዓዊ መብት አከባበር ዙሪያ የውይይት መድረክ መካሄዱ ተገልጿል፡፡

 

 

በማረሚያ ቤቶች ባለው የሰብዓዊ መብት አያያዝ ዙሪያ በአለም አቀፍ ደረጃ ባለው የሰብዓዊ መብት አጠባበቅ መለኪያዎች በ5 የፌዴራል ማረሚያ ቤቶች የዳሰሳ ጥናት መደረጉም ተገልጿል፡፡

 

 

በአዲስ አበባ በሁሉም ክፍለ ከተማ በሚገኙ ማቆያ ቦታዎች ጉብኝት የተደረገ መሆኑ ተገልጾ አፋጣኝ ምላሽ የሚፈልጉ ችግሮች እንዲፈቱ ጥረት ተደርጓል ተብሏል፡፡

 

 

በመጨረሻም ከቤቱ የተላያዩ ጥያቄዎች የተነሱ ሲሆን በዚህም ለተነሱ ጥያቄዎች የበላይ አመራሩ ምላሽ በመስጠትና ቀጣይ አቅጣጫ በማስቀመጥ ወይይቱ ተጠናቋል፤፤


  • _X3A3752.JPG 
  • _X3A3717.JPG 
  • _X3A3787.JPG