Search

የ.ኢ.ፌ.ዲ.ሪ ጠቅላይ ዐቃቤ ሕግ ለአዲስ አበባ ፖሊስ ኮሚሽን የምርመራ ክፍል ኃላፊዎች ስልጠና እየተሰጠ ይገኛል


26/3/2019

የ.ኢ.ፌ.ዲ.ሪ ጠቅላይ ዐቃቤ ሕግ በህገ-ወጥ መንገድ የተገኘን ገንዘብ ህጋዊ አስመስሎ ማቅረብ እና ሽብርተኝነትን በገንዘብ መርዳት ዙሪያ 68 ለሚሆኑ ከአዲስ አበባ ፖሊስ ኮሚሽን ለተውጣጡ የምርመራ ክፍል ኃላፊዎች ከመጋቢት 16 እስከ 18 ቀን 2011 ዓ.ም ለሦስት ተከታታይ ቀናት በሸበሌ ሆቴል ስልጠና እየሰጠ ይገኛል ፡፡

 

በመድረኩ የመክፈቻ ንግግር ያደረጉት በኢ.ፌ.ዲ.ሪ ጠቅላይ ዐቃቤ ሕግ የህግ ጥናት ማርቀቅና ማስረፅ ዳይሬክቶሬት ምክትል ኃላፊ የሆኑት አቶ እንዳልካቸው ወርቁ እንደተናገሩት ጠቅላይ ዐቃቤ ሕግ ወንጀልን መከላከልና ተፈጽሞም ሲገኝ ተጠያቂነት ማረጋገጥ ዋና ተግባሩ በመሆኑ በወንጀል ተግባር የተገኘን ገንዘብን ህጋዊ አስመስሎ ማቅረብና ሽብርተኝነትን በገንዘብ መርዳት ወንጀሎችን ለመከላከልና ለመቆጣጠር በሚቻልበት ሁኔታም የተለያዩ ስራዎች እየሰራ መሆኑን ጠቁመዋል፡፡

 

ምክትል ኃላፊው አክለውም በህገ ወጥ መንገድ የተገኘን ገንዘብ ህጋዊ አስመስሎ ማቅረብ እና ሽብርተኝነትን በገንዘብ መርዳት ወንጀሎች የሚያስከትሉት ጉዳት እጅግ ውስብስብና ከፍተኛ መሆኑን አስታውሰው በዚሁ የተገኘ ገንዘብ ወደ ኢኮኖሚ ሲቀላቀል የገበያ ውድድርን በማጥፋት ምርትና ምርታማነትን እንዲቀንስ ከማድረጉም በተጨማሪ የመንግስትን ገቢ እንዲቀንስና የፋይናንስ ስራዓቱ እንዳይረጋጋ እንዲሁም ግልፅ፣ ጤናማና ቀልጣፋ እንዳይሆን ከማድረጉም ሌላ ወንጀል እንዲስፋፋና የህግ የበላይነት ጥያቄ ውስጥ የሚያስገባ ነው ብለዋል፡፡

 

በመሆኑም ወንጀሉ ከፍተኛ ትኩረት የሚያስፈልገው እና ልዩ ትኩረት ተሰቶት በጋራ ሊሰራበት የሚገባ መሆኑን ተናግረዋል፡፡

 

እንደ አቶ እንዳልካቸው ንግግር አገራችን ኢትዮጵያ ይህንን ወንጀል ለመከላከልና ለመቆጣጠር የሚያስችል ጅምር ስራዎችን እያከናወነች ብትገኝም አሁንም ግን ብዙ የሚቀሩና የሚመለከታቸው ተቋማት በጋራ በሚፈለገው መልኩ አለመስራት፣ ባለሞያዎች ግንዛቤ አለመኖር እና ሌሎችም ችግሮች መኖራቸውን በማስታወስ በቅርቡ የአውሮፓ ህብረት አገራችንን በጥቁር መዝገብ ውስጥ በማስፈሩ ከዚህ ችግር ለመውጣት ሁላችንም ጠንክረን መስራት ይኖርብናል ብለዋል፡፡

 

ስልጠናውን በመስጠት ላይ ያሉት አቶ እንዳልካቸው ወርቁ ፣ አቶ ቢኒያም ሽፈራውና አቶ ፍጹም አባይነህ ሲሆኑ ስልጠናው የሚያተኩረው በህገ ወጥ መንገድ የተገኘን ገንዘብ ህጋዊ አስመስሎ ማቅረብ እና ሽብርተኝነትን በገንዘብ መርዳት ምንነት፣ ታሪካዊ ዳራው፣ በአገራችን የሚገኘው የህግ ማዕቀፍ ፣የምርመራ ሂደቱ ምን መምሰል እንዳለበት የሚዳስስ ነው ፡፡

 

ስልጠናው በህገ ወጥ መንገድ የተገኘን ገንዘብ ህጋዊ አስመስሎ ማቅረብ እና ሽብርተኝነትን በገዘብ መርዳት ወንጀልን ለመክሰስ በሌላ ማንኛውም ወንጀል ከአንድ አመት በላይ የሚያስቀጣ እና የኢኮኖሚ ጥቅም የሚያስገኝ ከሆነ በአዋጅ 780/2005 ሊታይ እንደሚችል ተገልጿል፡፡

 

በአዋጁ ከአመንጭ ወንጀሉ በተጨማሪ በህገወጥ መንገድ የተገኘን ገንዘብ በመውረስ የወንጀሉ ፈፃሚዎችን አቅም በማሳጣት ሌላው ከዚህ መሰል ድርጊት እንዲማር እንዲሁም ማንኛውም ሰው በህጋዊ መንገድ ብቻ ንብረት ማፍራት እንዳለበት በስልጠናው ተዳሷል፡፡

 

በህገ ወጥ መንገድ የተገኘን ገንዘብ ህጋዊ አስመስሎ ለማቅረብ ወንጀል ደረጃዎች ምንጬን ለመደበቅ በማሰብ በመቀላቀል ፣ በማወሳሰብና እንደገና የመደበቅ ሂደትን እንደሚያልፍ በሁሉም ደረጃዎች ምርመራ ማጣራት እንደሚቻል በስልጠናው ተገልጿል፡፡

 

በሌላ በህገ ወጥ መንገድ የተገኘን ገንዘብ ህጋዊ አስመስሎ ማቅረብ እና ሽብርተኝነትን በገንዘብ መርዳት ወንጀሎች የሚገናኙበትም ሁኔታና የምርመራ ሂደቱንም በተመለከተ በስልጠናው የተካተተ ነው፡፡

 

ተሳታፊዎችም በበኩላቸው ግልጽ ያልሆነላቸውን አንስተው ውይይት የተደረገበት ሲሆን በዘርፉ ከፍተኛ ክፍተት መኖሩን ጠቁመው ይህንን ችግር ለመቅረፍ ርብርብ እንደሚያሻው ጠቁመዋል፡፡


  • _X3A3916.JPG