Search

የሁለት ዓመት ልጇን የገደለች እናት በጽኑ እስራት ተቀጣች


2/4/2019

በኮልፌ ቀራንዮ ክፍለ ከተማ የሁለት ዓመት ልጇን በውሃ በተሞላ ባልዲ ውስጥ በመድፈቅና አየር እንዲያጥራት በማድረግ ከባድ የግድያ ወንጀል የፈፀመች ተከሳሽ በጽኑ እስራት ተቀጣች፡፡

 

ተከሳሽ አዲሴ ዘመነ በወንጀል ሕጉ አንቀፅ 539 1(ሀ) የተመለከተውን ክልከላ በመተላለፍ ጥቅምት 24 ቀን 2011 ዓ.ም ከጠዋቱ 12 ሰዓት በኮልፌ ቀራንዮ ክፍለ ከተማ 01 ክልል ውስጥ አየር ጤና አብያተ ማህበር እየተባለ ከሚጠራው አካባቢ በጭካኔ የገዛ ልጇን በውሃ በተሞላ ባልዲ ውስጥ በመድፈቅና አየር እንዲያጥራት በማድረግ ከገደለች በኋላ በምትኖርበት መኖሪያ ቤት ግቢ ውስጥ የቀበረቻት መሆኑን የክስ መዝገቡ ያስረዳል፡፡

 

ተከሳሽ ከደቡብ ጎንደር ዞን ማክሰኝት ከተማ ወደ አዲስ አበባ በመምጣት ትዳር መስርታ ለ3 ዓመት ያክል ከቀድሞ ባለቤቷ ከአቶ አዱኛ ጋር የኖረች ሲሆን የአብራካቸው ክፋይ የሆነችውን ህጻን ፌቨን አዱኛን ከወለዱ በኃላ በመለያየታቸው ምክንያት ከሌላ ግለሰብ ጋር ለሁለተኛ ጊዜ ጋብቻ መስርታ ለ9 ወራቶች ያክል መቆየቷን የክስ መዝገቡ ያብራራል፡፡

 

ዐቃቤ ሕግ ተከሳሽን ጥፋተኛ የሚያስብሉ የአስከሬን ምርመራ ውጤት፣ የሰውና የሰነድ ማስረጃዎች ለፍርድ ቤቱ በማቅረብ ተከሳሽ ጥፋተኛ መሆኗን በማስረዳት ተከራክሯል፡፡

 

ተከሳሽ በትዳር በኖረችባቸው ጊዜያቶች ስራ የሌላት መሆኑ፣ ሁለተኛውን የትዳር አጋሯን በስራ ማገዝ አለመቻሏና ልጅ ያለውን ግለሰብ በቤት ሰራተኛነት ቀጥሮ የሚያሰራ አካል ባለመኖሩ ለከፋ የኢኮኖሚ ችግር መጋለጧ ያበሳጫት ከመሆኑም በላይ ከሁለተኛው የትዳር አጋሯ ጋር በተፈጠረ ድንገተኛ ግጭት ተስፋ በመቁረጥ በነፃነት ስራ ለመስራት አስባ ልጀን የገደለቻት መሆኑን ለፍርድ ቤቱ የእምነት ክህደት ቃሏን ሰጥታለች፡፡

 

የፌዴራሉ ከፍተኛ ፍርድ ቤት ልደታ ምድብ 20ኛ የወንጀል ችሎትም የግራ ቀኙን ክርክር በማዳመጥና መዝገቡን በመመርመር ተከሳሽ በፈፀመችው ወንጅል ጥፋተኛ ናት በማለት በ18 ዓመት ጽኑ እስራት እንድትቀጣ ወስኗል፡፡


  • 50597992_2083116238449116_6550924796941565952_n.jpg