Search

በከባድ የሙስና ወንጀል የተጠረጠሩ 59 የመንግስት የሥራ ኃላፊዎችና ግብረ አበሮቻቸው በቁጥጥር ሥር መዋላቸው ተገለፀ


12/4/2019

ጠቅላይ ዐቃቤ ህጉ አቶ ብርሃኑ ፀጋዬ በወቅታዊ የሥራ እንቅስቃሴዎች ዙሪያና በከባድ የሙስና ወንጀል ተጠረጥረዉ በቁጥጥር ሥር እየዋሉ የሚገኙ አካላትን በተመለከተ ዛሬ ሚያዚያ 4 ቀን 2011 ዓ.ም ከሰዓት በኃላ በጽ/ቤታቸው ለመገናኛ ብዙኀን ጋዜጣዊ መግለጫ ሰጥተዋል፡፡

 

በመንግስት ተቋማት እና ፕሮጀክቶች ላይ የተፈጸመ ከባድ የሙስና ወንጀልን በተመለከተ በተለይም የመንግስት ግዥ ንብረት አስተዳደርና ማስወገድ አገልግሎት፣የውሃ ስራዎች ኮንስትራክሽን ኮርፖሬሽንና በመድሃኒት ፈንድ ኤጀንሲ በሶስቱም ተቋማት በበርካታ ሚሊየን የሚቆጠር የመንግስትና የህዝብ ሀብት የመዘበሩ ከዚህ ወንጀል ጋር በተያያዘ የተደራጀዉ የምርመራ ቡድን በቂ ማሰረጃና መረጃ በመሰብሰብ 59 በወንጀሉ የተጠረጠሩ የቀድሞ የሥራ ኃላፊዎችና ግብረአበሮች በቁጥጥር ሥር በማዋል ዐቃቤ ሕግ ክስ ለመመሰረት ተጨማሪ የምርመራ ሥራ እያከናወነ እንደሚገኝ ገልፀዋል ፡፡

 

በተደራጀ መልኩ በሙስና ወንጀል እጃቸው አለበት ተብሎ ከተጠረጠሩት መካከልም የቀድሞ የመንግስት ግዥ ንብረት አስተዳደርና ማስወገድ አገልግሎት ዋና ዳይሬክተር፣ የኢትዮጵያ ንግድ ሥራዎች ኮርፖሬሽን ዋና ሥራ አስፈጻሚ፣ የመንግስት ግዥ ንብረት አስተዳደርና ማስወገድ አገልግሎት ም/ዋና ዳይሬክተሮች፣የውሃ ስራዎች ኮንስትራክሽን ኮርፖሬሽን ዋና ስራ አስፈጻሚ የነበረ፣የውሃ ስራዎች ኮንስትራክሽን ኮርፖሬሽን የፕሮጀክት ስራ አስኪያጅ፣የመድሃኒት ፈንድ ኤጀንሲ ዋና ዳይሬክተር የነበረ፣የመድሃኒት ፈንድ ኤጀንሲ ም/ዋ/ዳይሬክተር እና ሌሎች የነዚህ ተቋማት መካከለኛ አመራሮችና ባለሙያዎች በተጨማሪም በጥቅም የተሳሰሩ ሌሎች ግበረ አበሮቻቸው እንደሚገኙ በመግለጫዉ ይፋ ተደርጓል፡፡

 

በተያያዘም ጠቅላይ ዐቃቤ ህጉ አቶ ብርሀኑ ወቅታዊ የስራ እንቅስቃሴዎችን በተመለከተ መግለጫ የሰጡ ሲሆን ተቋሙ የህግና የፍትህ ምህዳሩን ለማስፋትና የህግ የበላይነትን ለማረጋገጥ የቆመላቸው ዋና ዋና ዓላማዎች ማለትም ህገ መንግስቱን እና ህገ-መንግስታዊ ስርአቱን ማክበርና ማስከበር፣ የህግ የበላይነትን ማረጋገጥ፣ የወንጀል ህግን ማስከበርና የፌዴራል መንግስቱን እና የህዝብን የፍትሐ ብሄር ጥቅም ለማስጠበቅ በሚያስችል መልኩ ተቋማዊ ለውጦችን ማከናወኑን ተናግረዋል፡፡

 

በመደበኛ ሥራዎች ላይም ሰፋፊ ለዉጦች ማምጣት ጀምረናል ያሉት ጠቅላይ ዐቃቤ ህጉ በሥራ ላይ ያሉትን ህጎችና አተገባበር በማጥናትና የባለድርሻ አካላትን ባሳተፈ መልኩ ለማሻሻል የህጎቹን አተገባበር የሚገመግም ጥናትና በጥናቶቹ ግኝት ተከታታይ የባለድርሻ አካላት የምክክር መድረኮች በማካሄድ ከተገኘው ግብዓት በመነሳት ረቂቅ ሕግ የማዘጋጀትና በረቂቅ ህጎችም ላይ ግብዓት የማሰባሰብ ተግባር መከናወኑን አዉስተዉ አጠቃላይ የተሰሩ የህግ ማሻሻያዎችን አፈፃፀምን በመግለጫቸዉ አንስተዋል፡፡

 

በተጨማሪም በልዩ ሁኔታ ምርመራና ክስ እየተደረገባቸው ያሉ ጉዳዩችን በተመለከተ የሰብአዊ መብት ጥስት ወንጀል ፈጽመዋል በሚል 42 ሰዎች በቁጥጥር ሰር ዉለዉ የወንጀል ምርመራ ሲጣራባቸው የነበረ መሆኑ የተገለፀ ሲሆን በ10 የፌደራልና የአዲስ አበባ ፖሊስ አባላት እንዲሁም በ9 የማረሚያ ቤት አመራሮች ላይ ክስ ተመስርቶ በክርክር ሂደት ላይ ያለ ሲሆን፣ በ21 የደህንነት አባላት ምርመራ ተከፍቶ ምስክር እየተሰማ እንደሚገኝ ተገልጿል፡፡

 

በተያያዘ መልኩም በተለያዩ ቦታዎች ከተፈጠሩ ሁከትና ብጥብጦች ጋር ተያይዞ በተከናወነ የምርመራ ሥራዎች በወንጀል ተግባራት የተሳተፉ አካላትን ለይቶ ለሕግ በማቅረብ በኩል በርካታ ተግባራት እየተከናወኑ እንደሆነ ለአብነትም በሀዋሳ ከተማ ከተፈጠረው ሁከትና ብጥብጥ፣ ሱማሌ፣ ቤንሻንጉል ጉምዝ የተፈጸመ ወንጀል፣በኦሮሚያ ክልል ቡራዩና በአዲስ አበባ በተለያዩ በክፍለ ከተሞች ተነሰቶ የነበረው ሁከትና ብጥብጥ ተሳታፊ የሆኑ አካላትን ለህግ የማቅረብ ስራ እየተከናወነ መሆኑ ተገልጿል፡፡

 

በመጨረሻም ጠቅላይ ዐቃቤ ህጉ ባለፉት ሁለት ሳምንታት በተለያዩ አካባቢዎች ዓለማቀፍ ግንኙነት ያላቸዉና የሽብር ወንጀል ለመፈፀም በዝግጅት ላይ የነበሩ አካላትን ሊያደርሱት የነበሩትን ጉዳት በመቆጣጠርና ቁጥጥር ስር ለማዋል ከብሄራዊ የመረጃ ደህንነት ጋር በቅንጂት እየተሰራ መሆኑንና የምርመራው ሂደት እንደተጠናቀቀ ለህዝብ ይፋ ይደረጋል ካሉ በኃላ ሰላም የሁላችንም ሀብት በመሆኑ ሁሉም የህብረተሰብ ክፍል ከመንግስት ጎን በመቆም በጋራ ሊሰራ ይገባል ሲሉ ጥሪ አስተላልፈዋል፡፡


  • _X3A4718.JPG