Search

ቼክ ያጭበረበረዉ ግለሰብ በፅኑ እስራትና በገንዘብ ተቀጣ


5/5/2019

ተከሳሽ አብይ አሽኔ ሰኔ 8 ቀን 2010 ዓ.ም በግል ተበዳይ ቶማስ ብዙ አየሁ ላይ በፈጸመዉ የቼክ ማጭበርበር ወንጀል ክስ ተመስርቶበታል፡፡

 

ተከሳሽ በኢ.ፌ.ዴ.ሪ. የወንጀል ሕግ አንቀጽ 693/1/ ስር የተመለከተዉን በመተላለፍ በኦሮሚያ ክልል ቡራዩ ከተማ ልዩ ስሙ ከታ አካባቢ በሚገኘዉ ኦሮሚያ ኢንተርናሽናል ባንክ በስሙ ከፍቶ ከሚያንቀሳቅሰዉ አካዉንቱ ብር እንደሌለዉ እያወቀ ለግል ተበዳይ ቶማስ ብዙአየሁ የሶስት መቶ ሺህ (300000) ብር ቼክ ጽፎ በመስጠቱና የግል ተበዳዩም ገንዘቡን ለማዉጣት ሐምሌ 24 ቀን 2010 ዓ.ም ኮተቤ ከሚገኘዉ የባንኩ ቅርንጫፍ ለማዉጣት ሲሄድ በአካዉንቱ ላይ ብር እንደሌለ በመረጋገጡ በዐቃቤ ህግ ክስ ተመስርቶበታል፡፡

 

ተከሳሹም በአካዉንቱ ላይ ገንዘብ እንደሌለዉ እያወቀ ያለዉ አስመስሎ ለግል ተበዳይ ደረቅ ቼክ ጽፎ በመስጠቱ እና በማጭበርበሩ የቀረበበትን ክስ አስመልክቶ በፌደራሉ ከፍተኛ ፍርድ ቤት ቦሌ ምድብ የወንጀል ችሎት ቀርቦ ድርጊቱን መፈጸሙንና ጥፋተኛ መሆኑንም አምኗል፡፡

 

ፍርድ ቤቱም ተከሳሹ የቀረበበትን ክስ ሙሉ በሙሉ በማመኑ በወ/መ/ህ/ስ/ቁ/134/1/ መሰረት የጥፋተኝነት ዉሳኔ ሰጥቷል፡፡

 

በመሆኑም ፍርድ ቤቱ የተከሳሹን የቀደመ መልካም ባህሪ፤ ጥፋቱን አምኖ መጸጸቱንና የቤተሰብ አስተዳዳሪ መሆኑን በቅጣት ማቅለያነት ይዞ ሚያዚያ 8 ቀን 2011 ዓ፣ም በዋለዉ የፌደራሉ ከፍተኛ ፍ/ቤት ቦሌ ምድብ 1ኛ የወንጀል ችሎት ተከሳሽን ያስተምረዋል፤ ያርመዋል በማለት በሁለት ዓመት ከስድስት ወር ጽኑ ዕስራት እና በሁለት ሽህ ብር የገንዘብ መቀጮ እንዲቀጣ ወስኖበታል፡፡


  • Capture 672.JPG