Search

የጥላቻ ንግግርና የሀሰተኛ መረጃ ሥርጭትን ለመከላከል በተዘጋጀው ረቂቅ አዋጅ ላይ ለሦሰተኛ ጊዜ ውይይት ተካሄደ


10/6/2019

የኢፌዲሪ ጠቅላይ ዐቃቤ ሕግ የጥላቻ ንግግርና ሀሰተኛ መረጃ ሥርጭትን ለመከላከል በአዘጋጀው ረቂቅ አዋጅ ዙሪያ ከህግ ባለሙያዎች፣ ከመገናኛ ብዙሃን፣ ከአክቲቪስቶች፣ ከፖለቲካ ፓርቲ ተወካዮች እንዲሁም ጉዳዩ ከሚመለከታቸው የተለያዩ ተቋማት ተወካዮች ጋር ዛሬ (ግንቦት 30 ቀን 2011 ዓ.ም) ወይይት አካሂዷል፡፡


ወይይቱን በንግግር የከፈቱት ምክትል ጠቅላይ ዐቃቤ ሕግ ዶ/ር ጌዲዎን ጢሞቲዎስ የጥላቻ ንግግር ለሀገር ስላምና ለዜጎች ደህንነት ጠንቅና ስጋት ከመሆኑም ባለፈ በተለያዩ አከባቢዎች ብሄርን መሰረት በማድረግ በዜጎች ሕይወት፣ አካልና ንብረት ላይ ተደጋጋሚ ጉዳት መድረሱን ጠቁመው በተመሳሳይ ሀሰተኛ መረጃዎች መሰራጨታቸው ለግጭቶች እና ለሰዎች መሰረታዊ መብቶች መጣስ መንስኤ በመሆኑ የአዋጁ መዘጋጀት አስፈላጊ እንደሆነ ተናግረዋል፡፡


በማያያዝም ምክትል ጠቅላይ ዐቃቤ ሕጉ ማንኛዉም ሰው የጥላቻ ንግግርና የሀሰት መረጃዎችን በብሮድካስት፣ በህትመትና ማህበራዊ ሚዲያዎች በጽሁፍ፣ በምስል እንዲሁም በድምጽ የሰራጨ እንደሆነ የወንጀል ድረጊት መፈፀሙን የአዋጁ ይዘት ያትታል ብለዋል፡፡


በመድረኩ እንደተገለጸው መረጃን የሚያሰራጭ ማንኛውም አካል የሌላውን ሰው ወይንም ማህበረሰብ፣ ብሔር፣ ሐይማኖት፣ ፆታና አካል ጉዳተኝነትን መሰረት ካደረገ የጥላቻ ንግግርና ከሀሰተኛ መረጃ ስርጭት እራሱን የፀዳ ማድረግ እንደሚገባ ተጠቁሟል፡፡


ረቂቅ አዋጁን በተመለከተ የመድረኩ ተሳታፊዎች እንደተናገሩት አዋጁ አስፈላና ሊተገበር የሚገባዉ መሆኑን ገልጸው የቅጣት መጠኑ በረቂቅ አዋጁ ከተቀመጠው አስተማሪ በሆነ መልኩ ከፍ እንዲልና የህጉ ተደራሽነት እስከ ታች ባለው የመንግስት መዋቅር ወርዶ እንዲተገበር አስተያየት ሰጥተዋል፡፡


በመጨረሻም ምክትል ጠቅላይ ዐቃቤ ሕግ ዶክተር ጌዲዎን ጢሞቲዎስ በተሳታፊዎች ለተነሱ ጥያቄዎች ማብራሪያና ምላሽ የሰጡ ሲሆን በአስተያየት መልኩ የተነሱ ጠቃሚ ሀሳቦችን በረቂቅ አዋጁ በግብዓትነት በማከተት ለሚመለከተው አካል እንደሚቀርብ ተናግረዋል፡፡


  • 61940605_2290570327703705_5334566101386788864_n.jpg 
  • 62029474_2290570637703674_5176796744125513728_o.jpg