Search

በሙስና ወንጀል ተጠርጥረው ክስ የተመሰረተባቸው የቀድሞ የኢትዮ ቴሌኮም የስራ ኃላፊዎች ያቀረቡት የክስ መቃወሚያ ውድቅ ተደረገ


23/7/2019

ተከሳሻች 1ኛ ወ/ጊዮርጊስ ወልዱ፣ 2ኛ ኢሳያስ ዳኘው፣ 3ኛ አብዱልኃፊዝ አህመድ እንዲሁም 4ኛ ፀጋዬ መኮነን ሲሆኑ የኢትዮ ቴሌኮም የኤን.ጂ.ፒ.ኦ ማኔጅመንት ኮሚቴ ሆነው ሲሰሩ በነበረበት ወቅት ራሳቸውን የስትሪንግ ኮሚቴ አድርገው በመሰየም የተጣለባቸውን የመንግስት ከፍተኛ ኃላፊነት ወደ ጎን በመተው ከትምህርት ሚኒስቴር ለኢትዮ ቴሌኮም የቀረበ የግዥ ትዕዛዝ ሳይኖር የዩኒቨርስቲ ኔትወርክ ግንባታ ግዥን ምክንያት በማድረግ ተገቢ ያልሆነ ጥቅም ለራሳቸውና ዜድ.ቲ.ኢ ለተባለ የቻይና ኩባንያ ለማስገኘት በማሰብ የ768,704,468 ሚሊዮን ብር ቀጥታ ግዥ በመፈጸም በመንግስት ላይ ጉዳት በማድረስ ወንጀል ተጠርጥረው ክስ የተመሰረተባቸው መሆኑ ይታወቃል፡፡

 

2ኛና 3ኛ ተከሳሾች በዐቃቤ ሕግ ክስ ላይ መቃወሚያ ያቀረቡ ሲሆኑ 1ኛ እና 4ኛ ተከሳሾች ደግሞ በቁጥጥር ስር አለመዋላቸውን ከችሎቱ ለመረዳት ተችሏል፡፡

 

2ኛ እና 3ኛ ተከሳሾች በተከላካይ ጠበቃቸው አማካኝነት ዐቃቤ ሕግ ግንቦት 16 ቀን 2011 ዓ.ም አሻሽሎ ባቀረበው ክስ ላይ በተጨማሪነት ያቀረባቸው ማስረጃዎች የተከሳሾችን የመከላከል መብት የሚጎዳ በመሆኑ እንዲሁም ክሱ ምን ያህል ጉዳት በማን ላይ እንደደረሰ አያመከላክትም በማለት መቃወሚያቸውን አቅርበዋል፡፡

 

በሌላ በኩል 3ኛ ተከሳሽ የስትሪንግ ኮሚቴው ሰብሳቢ የነበሩት ዶ/ር ደብረጽዮን ገ/ሚካኤል በክሱ ሳይካተቱ እኛ ብቻ መከሰሳችን በህገ - መንግስቱ እኩል የመዳኘት መብታችንን የገረሰሰ ነው በማለት ተናግረዋል፡፡

 

ዐቃቤ ሕግ በበኩሉ በተከሳሾች በኩል የቀረቡ መቃወሚያዎች የሕግ መሰረት የላቸውም በማለት ምላሽ ሰጥቷል፡፡

 

የፌዴራሉ ከፍተኛ ፍርድ ቤት ልደታ ምድብ 15ኛ የወንጀል ችሎትም ሐምሌ 16 ቀን 2011 ዓ.ም በዋለው ችሎት በተከሳሾች በኩል የቀረቡትን መቃወሚያ ውድቅ ያደረገ ሲሆን በክሱ ላይ ዶ/ር ደብረጽዮን ገ/ሚካኤል መካተት ነበረባቸው ለተባለው ጉዳይ ዐቃቤ ሕግ ክስ የመሰረተው በፖሊስ የምርመራ መዝገብ መሰረት መሆኑን በማስረዳት ፍርድ ቤቱ ተከሰዋል ተብለው በችሎት የቀረቡለትን የማከራከርና ፍትህ የመስጠት እንጂ በክስ መዝገብ አልተካተተም የተባለው ግለሰብ አለመካተት እየታየ ያለዉን ጉዳይ ለመዳኘት የሚከለክል አለመሆኑን አስረድቷል፡፡

 

በመጨረሻም ፍርድ ቤቱ እስከ ነሀሴ 26 ቀን 2011 ዓ.ም ድረስ በዐቃቤ ሕግ ክስ መዝገብ ላይ ተሻሽለው መቅረብ ያለባቸው ጉዳዮች እንዲሻሻሉ እና እንዲቀርቡ ትዕዛዝ ሰጥቷል፡፡


  • 67281652_2371467906280613_1837419535016132608_o.jpg