Search

በሴቶችና ህጻናት ላይ የሚፈጸሙ ጥቃቶችን ለመከላከል በቅንጅት እየተሰራ መሆኑ ተገለጸ


23/9/2019

ከሴቶችና ህጻናት ጋር በተያያዘ በተለያዩ ቦታዎች ጥቃት መፈጸሙት ተከትሎ የሴቶችና ህጻናት ባለ ብዙ ዘርፍ ጉዳዮች ዳይሬክቶሬት በ2011ዓ.ም ከሴቶችና ህጻናት ጥቃት ጋር ተያይዞ ችግር ያጋጠማቸውን የማህበረሰብ ክፍል ለማገዝ በጋንዲ፣ ሚኒሊክ እና ጥሩነሽ ቤጂንግ እንክብካቤ ማዕከል ውስጥ ለ1726 ተገልጋዮች አገልግሎት መሰጠቱ የተገለጸ ሲሆን ችግሩን ከጅምሩ ለማስቀረትና በሴቶችና ህጻናት ላይ የሚፈጸሙ ጥቃቶችን ለመከላከልም ለ4100 የማህበረሰብ ክፍልሎች በተለያየ ጊዜ የንቃተ ህግ ትምህርት መሰጠቱን በጠቅላይ ዐቃቤ ህግ የሴቶች፣ ህጻናትና ወጣቶች ባለ ብዙ ዘርፍ ጉዳዮች ዳይሬክቶሬት ዐቃቤ ህግ የሆኑት ወ/ሪት ማህሌት አስፋው አብራርተዋል፡፡

 

ዐቃቤ ሕጓ አክለውም በሴቶችና ህጻናት ላይ በሚፈጸም ጥቃት ሰለባ የሆኑ አካላት በምስክር ማጣትና ሌሎች መሰል ተግባራት ክሳቸው ተቋርጦ ፍትህ ሳያገኙ እንዳይቀሩ ከሚመለከታቸው ባለ ድርሻ አካላት ጋር ያለውን ቅንጅታዊ አሰራር በማጠናከርና የጋራ እቅድ በማውጣት በየ15 ቀኑ እየተገናኙ ባጋጠሙ ችግሮችና በመፍትሄ ሀሳቦቻቸው ላይ ውይይት እየተደረገ በመሆኑ ችግሮቹን የማቃለል ስራ ተሰርቷል ብለዋል፡፡

 

የመረጃ አያያዝ ክፍተቶችን ለማሻሻልም የተሟላና የማያሻማ የመረጃ መያዣ ቅጽ በማዘጋጀት ለሁሉም ምድብ ጽህፈት ቤቶች የማሰራጨት ስራ በመስራቱ የተገልጋዮችን የመረጃ ክፍተትን ማሻሻል ተችሏል፡፡

 

በሌላ በኩል ጎጂ ልማዳዊ ድርጊቶችን ለመከላከል በአማራ፣ በደቡብ፣ በኦሮሚያ ምስራቅ ሀረርጌ፣ በአፋር እና በሱማሌ ክልል ጥናት መካሄዱን ገልጸው ችግሩን በማስቀረት የተሻለ አፈጻጸም በታየበት የአማራ ክልል ላይ የልምድ ልውውጥ እንዲደረግ በማድረግ ለሌሎች ክልሎች ተሞክሮን የማስፋት ስራ መሰራቱን ባለሙያዋ ገልጸዋል፡፡

 

ወ/ሪት ምዕራፍ ተስፋየሱስ በበኩላቸው በተቋሙ በሚገኙ ዳይሬክቶሬቶችና በተጠሪ ተቋማት የሴቶችና ህጻናት ጉዳይ ተካቶ እንዲሰራ የተደረገ መሆኑን ገልጸው አፈጻጸሙን ለመከታተል ያመች ዘንድም ቼክሊስት በማዘጋጀት በየሩብ ዓመቱ ክትትል ሲደረግ መቆየቱን አስታውሰዋል፡፡


በ2012 ዓ.ም በዳይሬክቶሬቱ ትኩረት ተሰጥቶ ከሚሰራባቸው ተግባራት መካከል በ2011 ዓ.ም የተጀመሩ ስራዎችን በተቀናጀ መልኩ ማስቀጠል፣ በተቋሙ ያሉ ሰራተኞች በወሊድ ጊዜ ፍቃዳቸው ሲጠናቀቅ ከልጆች እንክብካቤና ጡት ማጥባት ጋር ተያይዞ የሚገጥመውን ችግር ለመፍታት በተወሰኑ ምድብ ጽ/ቤትና በዋናው መስርያ ቤት የህጻናት ማቆያዎች መክፈት፣ የተቀናጀ የፍትህና እንክብካቤ መስጫ ማዕከል ቁጥርን በመጨመርና የአገልግሎት አሰጣጡን ጥራት ማሳደግ በዳይሬክቶሬቱ 2012 ዓ.ም ትኩረት ተሰጥቶ ከሚሰራባቸው ተግባራት ውስጥ ዋነኛዎቹ መሆናቸውን ገልጸዋል፡፡

 

በመጨረሻም ህብረተሰቡ በሴቶችና ህጻናት ላይ እያጋጠሙ ያሉትን ችግሮች ከመሰረቱ ለማስቀረት ከፍትህ አካላቱ ጎን በመቆም፣ ወንጀለኞችን በመጠቆምም ሆነ ወንጀልን በጋራ በመከላከሉ ተግባሩ ላይ መሰማራትን ባህል አድጎ መቀጠል የዘወትር ተግባሩ ሊሆን እንደሚገባም ጭምር ወ/ሪት ምዕራፍ ተስፋየሱስ መልዕክታቸውን አስተላልፈዋል፡፡


  • 71227801_2482874528473283_5099114761564454912_o.jpg 
  • 71408564_2482874565139946_8772027848002109440_o.jpg