Search

ከግማሽ ምዕተ አመት በላይ በስራ ላይ የቆየው የወንጀለኛ መቅጫ ስነ-ስርዓት ህግ የማሻሻል ስራው ተጠናቆ ለሚኒስትሮች ምክር ቤት መቅረቡ ተገለጸ


30/9/2019

ከ50 አመት በላይ በስራ ላይ የቆየው የወንጀለኛ መቅጫ ስነ-ስርዓት ህግ የማስረጃ ጉዳዮችን እንዲያካትት እና በ1996 ዓ.ም ከወጣው የወንጀል ህግ ጋር ስያሜው እንዲጣጣም ተደርጎ ሲሻሻል የነበረው ረቂቅ ተጠናቆ፤ ለሚኒስትሮች ምክር ቤት መቅረቡን በኢፌዲሪ ጠቅላይ ዐቃቤ ሕግ የህግ ጥናት ማርቀቅና ማስረጽ ዳይሬክቶሬት ዳይሬክተር የሆኑት አቶ በላይሁን ይርጋ ገለጹ፡፡

 

አቶ በላይሁን አያይዘውም ረቂቁ « የወንጀል ሕግ ስነ-ስርዓትና የማስረጃ ህግ» የሚል ስያሜ ተሰጥቶት በ444 አንቀጾች ተቀርጾና በርካታ ከዘመኑ ጋር የሚሄዱ አዳዲስ ጽንሰ ሃሳቦች ተካተውበት እንዲሁም የነበሩት ድንጋጌዎች አሁን ካለው የወንጀል ፍትህ አስተዳደር ስርዓት ጋር አብረው እንዲሄዱ ተደርገው መሻሻላቸውን ተናግረዋል፡፡

 

ዳይሬክተሩ አያይዘውም አዳዲስ ከተጨመሩት ፅንሰ ሀሳቦች መካከል ለአብነት የጠቀሱ ሲሆን እነዚህም የጥፋተኝነት ድርድር ማለትም በዐቃቤ ህግና በተከሳሽ መካከል ተከሳሽ ጥፋተኛነቱን በሚያምንበት ጊዜ በዐቃቤ ህግ በኩል የቅጣት መጠን ወይም የክስ ብዛትን ለመቀነስ የሚደረግ ስምምነትን በተመለከተ ረቂቁ ላይ የተቀመጠ ሲሆን በተጨማሪም የመጨረሻ ፍርድን እንደገና ስለማየት (Review of Judgment) ይህ ሲባል አንድ የወንጀል ጉዳይ ላይ ውሳኔ ከተሰጠ በኋላ ጉዳዩን እንደገና የማየት እንዲሁም ከዚህ በፊት የህግ ማዕቀፍ ያልነበረው በወንጀል ጉዳይ አለማቀፍ ትብብርና የሞት ፍርድ አፈጻጸምን በተመለከተ ውሳኔ ከተሰጠ ጀምሮ ከተቀመጠለት ከሁለት አመት በላይ ከቆየ ወደ እድሜ ልክ ጽኑ እስራት እንደሚቀየር በረቂቁ ላይ ተሻሽሎ መቀመጡን አቶ በላይሁን ገልጸዋል፡፡

 

የባህላዊ ስርዓቶችን በተመለከተ ከዚህ በፊት የህግ ማእቀፍ ውስጥ ያልተካተቱ መሆኑን ገልጸው በአሁኑ በተሻሻለው አዲስ ረቂቅ ላይ እውቅና የተሰጣቸው ሲሆን በተጨማሪም አሁን ያለው የዕርቅ አሰራር የሚያሻሽል የመንግስት ጥቅም የሌለባቸውን እስከ 3 አመት በሚደርስ ቀላል እስራት በሚያስቀጡ የወንጀል ጉዳዮች ላይ በሙሉ ተፈጻሚ እንዲሆኑ የማሻሻያ ሀሳብ ቀርቧል፡፡

 

በመጨረሻም አሁን በስራ ላይ ያለው የወንጀለኛ መቅጫ ስነ-ስርዓት ህግ ከወጣ በኋላ በተለያዩ አዋጆች ላይ የወጡ የማስረጃ እና የስነ-ስርዓት ድንጋጌዎች ተለቅመው አሁን በተዘጋጀው ረቂቅ ላይ እንዲካተቱ የተደረገ ሲሆን ይህም የማስረጃና ወንጀል ህግ ስነ-ስርዓት ድንጋጌዎች በአንድ ህግ ላይ ተሰባስበው እንዲገኙ የሚያስችል በመሆኑ ለአፈጻጸም ቀላል ተደራሽና ምቹ አሰራር እንዲኖራቸው እንደሚያስችል ዳይሬክተሩ ገልጸዋል፡፡

 


  • 72218938_405639306810428_4350516530400722944_n.jpg