Search

አለማቀፍ የግልግል ዳኝነትና የእርቅ አሰራር ማዕከል ለማቋቋም በተዘጋጀው ረቂቅ አዋጅ ላይ ከባለድርሻ አካላት ጋር ውይይት ተደረገ


3/10/2019

የኢፌዲሪ ጠቅላይ ዐቃቤ ህግ አለማቀፍ የግልግል ዳኝነትና የእርቅ አሰራር ማዕከል ለማቋቋም በተዘጋጀው ረቂቅ አዋጅ ግብዓት ለማሰባሰብ ከባለድርሻ አካላት ጋር ዛሬ በኢንተርኮንትኔንታል ሆቴል ውይይት አደረገ፡፡

 

የማዕከሉ አላማ በረቂቁ ላይ እንደተመላከተው የማህበራዊ፣ የኢኮኖሚያዊ፣ የንግድ፣ የኢንቨስትመንት እና የመሳሰሉት አለመግባባቶችን በግልግል ዳኝነትና በእርቅ ለመፍታት አስፈላጊ በመሆኑ እንዲሁም የፍርድ ቤቶችን ጫና፣ የጊዜ መጓተት፣ ተገቢ ያልሆኑ ወጪን ለማስቀረትና ብሎም አለመግባባቶችን በአማራጭ የዳኝነት ሥርዓት ለመፍታትና የተከራካሪ ወገኖችን ሕጋዊ መብትና ጥቅም ለመጠበቅ መሆኑኑ ተቀምጧል፡፡

 

የግልግል ዳኝነትና እርቅ ኢትዮጵያ ተቀብላ ያጸደቀቻውንና አባል የሆነችባቸውን ዓለም ዓቀፍ የግልግል ዳኝነት ስምምነቶች ተግባራዊ ለማድረግ፤ እንዲሁም ለነፃ ገበያ ኢኮኖሚ ማደግ አስተዋጽዖዎ ከፍተኛ መሆኑም ረቂቁ ላይ ተመላክቷል፡፡


በተጨማሪም ረቂቁ በውስጡ የማዕከሉ ሥልጣንና ተግባር፣የማዕከሉ መርህ፣. ፍርድ ቤት ጣልቃ የሚገባባቸውን ጉዳዮች እና ለግልግል የማይቀርቡ ጉዳዮች ምን ምን እንደሆኑ፣በማዕከሉ ስራ ላይ ስለሚውሉ ሕጎች፣የግልግል ስምምነት ቅርፅ ይዘትና ሌሎች አበይት ርዕሰ-ጉዳዮችን በውስጡ አካቶ ይዟል፡፡

 

ማዕከሉ መንግስታዊ የግልግል ዳኝነት ማዕከል በመሆኑ በመንግስት ሹመኞች የሆኑ የቦርድ አባላት፣ ዳይሬክተርና ሌሎች አስፈላጊ ሰራተኞች፣ እንደሚኖሩት ረቂቅ አዋጁ ላይ የተቀመጠ ሲሆን ስልጣንና ተግባራቸው ተቀምጧል ፡፡

 

በጠቅላይ ዐቃቤ ህግ የህግ፣ጥናት ማርቀቅና ማስረጽ ዳይሬክቶሬት ዳይሬክተር የሆኑት አቶ በላይሁን ይርጋ የረቂቁን ዝርዝር ሀሳብ ለመድረኩ ተሳታፊዎች ያቀረቡ ሲሁን ከተሳታፊዎችም የተለያዩ ሀሳቦች ተነስተው ውይይት ተደርጎባቸው ግብዓት ተሰባስቧል፡፡ በቀጣይም በተሰባሰበው ግብዓት መሰረት ረቂቁ ላይ ማስተካከያ ተደርጎ ለሚመለከተው አካል ተልኮ እንደሚጸድቅ ይጠበቃል፡፡


  • 68404425_2502078223219580_7845840664838275072_o.jpg 
  • 71199247_2502078216552914_106466904918458368_o.jpg