Search

የህብረተሰቡን ንቃተ ሕግ ማሳደግ ለፍትህ ሥርዓቱ መጎልበት ከፍተኛ ጠቀሜታ እንዳለው ተገለፀ


10/10/2019

በኢፌዴሪ ጠቅላይ ዐቃቤ ሕግ የልደታ ም/ጽ/ቤት በክፍለ ከተማው ለሚገኙ የማህበረሰብ ክፍሎች ዛሬ መስከረም 29 ቀን 2012 ዓ.ም በኢፌዴሪ ጠቅላይ ዐቃቤ ሕግ ብሎም በምድብ ጽ/ቤቱ በሚሰጡ አገልግሎቶች ዙሪያና በሴቶችና ሕፃናት እንዲሁም ከአረጋዊያን መብቶች ጋር በተያያዘ የግንዛቤ ማስጨበጫ ሥልጠና ሰጥቷል፡፡

 

ሥልጠናውን በንግግር የከፈቱት የምድብ ጽ/ቤቱ ኃላፊ አቶ ጌታቸው ሞረዳ የኢፌዴሪ ጠቅላይ ዐቃቤ ሕግ በአዋጅ በተሰጠው ሥልጣን መሰረት በሕግ ጉዳዮች የፌዴራል መንግስትን የማማከር፣ የወንጀልና የፍታብሄር ሕጎችን የማስከበር፣ የሕግ ማሻሻያ ጥናቶችን የማድረግ፣ ሕጎችን የማርቀቅና የማስረጽ እንዲሁም የሕጎች አተገባበር ወጥነት ያለው መሆኑን የማረጋገጥ፣ ብሄራዊ የሰብአዊ መብት ድርጊት መርሀ ግብር ተግባራዊነቱን የመከታተል እና ሌሎች ዘርፈብዙ አገልግሎቶችን ለህብረተሰቡ በመሰጠት ላይ የገኛል ብለዋል፡፡

 

ኃላፊው አያይዘውም ተቋሙ ለህብረተሰቡ ከሚሰጠው አገልግሎት በተጨማሪ የህብረተሰቡን ንቃተ ሕግ በማሳደግ የፍትህ ሥርዓቱን ከማጎልበት አንፃር ህብረተሰቡ የመንግስት አጋር በመሆን አይነተኛ ሚና መጫወት እንዲችል ማድረግ ይገባል በማለት ተናግረዋል፡፡

 

የምድብ ጽ/ቤቱ ምክትል ኃላፊ የሆኑት ወይዘሪት ጺዮን ሸፈራው ስለ ሥልጠናው አስፈላጊነት ተጠይቀው ሥልጠናው ዘርፈ ብዙ ጠቀሜታ አለው ካሉ በኃላ በተለይ በህብረተሰቡ ዘንድ ሕግን የማስከበር ኃላፊነት የመንግስት ቢቻ አድርጎ የመውሰድ አዝማሚያ በስፋት እየተሰተዋለ በመሆኑ ማህበረሰቡም ከሕግ ማስከበር እና መብቱንና ግዴታዉን አውቆ ለተግባራዊነቱ ከመንቀሳቀስ አንጻር ግንዛቤ ተፈጥሮለት የመንግሥት አጋር እንዲሆን ማስቻል ከምንም በላይ ትኩረት ሊሰጠው የሚገባ ጉዳይ ነው ብለዋል፡፡

 

በኢፌዴሪ ጠቅላይ ዐቃቤ ሕግ ተቋም ዐቃቤ ህግ የሆኑት አቶ ዳንኤል ዘውገማሪያም እና ወይዘሪት ሩሃማ አለምነህ በበኩላችው በመድረኩ ለተገኙት የሥልጠና ተሳታፊዎች ስልጠናና ማብራሪያ የሰጡ ሲሆን ማህበረሰቡ ከሕግ አንፃር የሚሰጡ አገልግሎቶችን በእውቀት ላይ ተመሥርቶ ከአገልግሎቱ መጠቀም እንዲችልና በተለይ ከሴቶችና ሕፃናት እንዲሁም ከአረጋዊያን መብት አንፃር በህገ መንግሥቱ ተካተው የሚገኙ መብቶች እንዲከበሩ በተጠናከረ መልኩ መስራት የስፈልጋል ብለዋል፡፡

 

በመጨረሻም የማህበረሰቡን ንቃተ ሕግ ከማሳደግ አንፃር መሰል መድረኮችን በማዘጋጀት በክፍለ ከተማው የሚገኙ የተለያዩ የማህበረሰብ ክፍሎችን ግንዛቤ ለማሳደግ በተደጋጋሚና በተጠናከረ መልኩ እንደሚሰራ በም/ጽ/ቤቱ ገለጻ ተደርጓል፡፡

 

በስልጠናው ከ800 በላይ የሆኑ ከልደታ ክፍለ ከተማ አሥሩም ወረዳዎች የተወጣጡ ነዋረዎች ተሳታፊ መሆናቸውን ማወቅ ችለናል፡፡


  • 72317696_2516202541807148_1317998087297302528_o.jpg 
  • 72540067_2516205521806850_7289003442016616448_o.jpg