Search

ህገ ወጥ የሰዎች ዝዉዉርን በተመለከተ ከህዝብ ተወካዮች የምክር ቤት አባላት ጋር ዉይይት ተካሄደ


16/10/2019

የኢፌዴሪ ጠቅላይ ዓቃቤ ሕግ ከአለም አቀፉ የፍልሰት ድርጅት (አይ ኦ ኤም) ጋር በጋራ በመሆን በሰዎች መነገድ፣ ሰዎችን በህገ ወጥ መንገድ ድንበር ማሻገር ወንጀልን አስመልክቶ ለህዝብ ተወካዮች የምክር ቤት አባላት ባዘጋጁት የዉይይት መድረክ ላይ የኢፌዴሪ ምክትል ጠቅላይ ዐቃቤ ሕግ ዶክተር ጌዲዬን ጢሞቲዎስ በመድረኩ ተገኝተዉ ዉይይቱን ከፍተዋል፡፡


በዉይይቱ ላይ የፍልሰት ዓለም አቀፋዊ ሁኔታን አስመልክለቶ በአለም አቀፍ የፍልሰተኞች ድርጅት ባለሙያ አማካኝነት ፅሁፍ የቀረበ ሲሆን አቅራቢዉ አለም አቀፍ ፍልሰትን በተመለከተ አብዛኛዉን ቁጥር እየሸፈኑ ያሉት የአፍሪካና የኢዥያ አገራት መሆናቸዉን ጠቅሰዉ አገራችንም ህጋዊ ባልሆነ መንገድ በሚደረጉ ፍልሰቶች ዋነኛ ተጋላጭ መሆኗን ገልጸዉና ከኢትዮጵያ የሚወጡ ዜጎችም ከ85 በላይ የሚሆኑት በኢኮኖሚ ተፅእኖ የተሻለ ኑሮ ፍለጋ መሆኑን ተናግረዉ በዚሁም ከስደት ዉጭ ያሉ አማራጮችን የሚያይ ህብረተሰብ መፍጠር ትልቅ ትኩረት የሚሻ ጉዳይ መሆኑን አክለዋል፡፡


ቀጥሎም በኢፌዲሪ ጠቅላይ ዓቃቤ ሕግ የፀረ ህገ ወጥ የሰዎች ዝዉዉር ግብረ ሀይል ማስተባበሪያ ፅ/ቤት አስተባባሪ የሆኑት ወ/ሮ ፈትያ ሰኢድ በበኩላቸዉ እንደ መንግስት ምን ስራዎች ተከናወኑ፣ምን ችግሮችስ ገጠሙ እና በቀጣይስ ምን መደረግ አለበት የሚሉ ጉዳዮች በተመለከተ ፅሁፍ አቅርበዋል፡፡

 

አስተባባሪዋ ኢትዮጵያ ከሌሎች አገራት የሚመጡ ከ1 ሚሊዬን በላይ ስደተኞችን መቀበሏን ገልጸዉ በተቃራኒዉ ደግሞ በርካታ ዜጎቻችን ከተለያዩ የአገሪቱ አካባቢዎች መዳረሻቸዉን ሳዉድ አረቢያና ደቡብ አፍሪካ በማድረግ ይፈልሳሉ በዚህም ሴቶች፣ህፃናትና ወጣቶች በችግሩ ተጠቂ ናቸዉ ካሉ በኋላ ለዚህ አስከፊ ለሆነዉ ተግባርም መፍትሄ ይሆናሉ የተባሉ አዳዲስ የህግ ማእቀፎችን ማዘጋጀት፣አሰራርና አደረጃጀቶችን መዘርጋት፣ግንዛቤን መፍጠርን፣አጥፊዎችን ማስቀጣትና ከክልሎች ጋር በመሆን የማደራጀት ተግባራት በመፍትሄነት እየተሰራባቸዉ ያሉ ተግባራት መሆናቸዉን ተናግረዋል፡፡

 

ወ/ሮ ፈትያ አክለዉም ህገ ወጥ የሰዎች ዝዉዉር ስራ የእገሌ የማይባልና የበርካታ ባለ ድርሻ አካላትን ትብብርና ቅንጅት የሚጠይቅ ተግባር በመሆኑ ሁሉም አካላት በተለይም የምክር ቤት አባላት ወደ ወከሉት ህዝብ ሲወርዱ የተግባሩን ክብደት ትኩረት በመስጠት በጋራ ልንሰራበት ይገባል ብለዋል፡፡


በመጨረሻም የዉጭ አገር የስራ ስምሪት አገልግሎት ጋር ተያይዞ እየተከናወኑ ያሉ ተግባራትን አስመልክቶ በሰራተኛና ማሀበራዊ ጉዳይ ሚኒስቴር አማካኝነት ፅሁፍ የቀረበ ሲሆን በዉይይቱ የቀረቡትን ሁሉም ፅሁፎችን አስመልክቶ በህዝብ ተወካዮች ምክር ቤት አባላት ሰፊ ዉይይት ተደርጎባቸዋል፡፡


  • 72387064_2528359120591490_8025462102737027072_o.jpg