Search

በግድያ ፣ በንብረት ላይ የሚፈፀሙ ልዩ ልዩ የወንጀል ጉዳዮችን የምርመራ ስራ ጥራትን ለማሳደግ የአሠራር ስርዓት መዘርጋቱ ተገለጸ


19/10/2019

ባለፈዉ በጀት አመት ልዩ ልዩ የወንጀል ጉዳዮችን አስመልክቶ በግድያ ጉዳዮች ፣ በንብረት ላይ የሚፈፀሙ የወንጀል ጉዳዮችን እንዲሁም የልዩ ልዩ ወንጀል ጉዳዮችን አስመልክቶ ቡድን በማደራጀት የምርመራ ስራ ጥራትን ለማሳደግ የአሠራር ስርዓት መዘርጋቱንና በዚህም ውስን የምርመራ ክፍተቶችን ለመሙላት ጥረት መደረጉን በኢ.ፌ.ዴ.ሪ ጠቅላይ ዐቃቤ ሕግ የልዩ ልዩ ጉዳዮች ዳይሬክቶሬት ዳይሬክተር የሆኑት ወ/ሪት ወሰን የለሽ አድማሱ ገለፁ፡፡

 

ዳይሬክተሯ አያይዘዉም የምርመራ ጥራትን በማሳደግ የማጥራት ምጣኔ ከመጨመር አንፃር በመዛግብት ላይ በተሰጡ ውሳኔዎች በከባድ ወንጀሎች የአያስከስስም ውሳኔ በወ/መ/ስ/ስ/ህ/ቁ 42/1/ሀ/ መሠረት በከባድ ወንጀሎች በ43 መዝገቦች ላይ፣ በመካከለኛ በ80 መዛግብት ላይ እና በቀላል ወንጀሎች በ73 መዝገቦች ላይ የአያስከስስም ውሳኔ የተሰጠ ሲሆን በአጠቃላይ በ197 መዛግብት ላይ አያስከስስም ውሳኔ መሰጠቱን ተናግረዋል፡፡

 

አክለዉም በዳይሬክቶሬቱ በከባድ መካከለኛና ቀላል ወንጀሎች የማስቀጣት ምጣኔን አስመልክቶ በአጠቃላይ በአማካኝ 95% ለማድረስ ታቅዶ የነበረ ቢሆንም በባለፈው በጀት አመቱ ማጠቃለያ የማስቀጣት ምጣኔ 91.87% ማድረስ መቻሉን ገልፀዉ ይግባኝን በተመለከተም ከተቋሙ አጠቃላይ የዐቃቤ ህግ ይግባኝ አፈፃፀም የማሻሻል ግብ ምጣኔ አንፃር 65% እቅድ ተይዞ ሲሰራ እንደነበርና በጠቅላይ ፍ/ቤት 89.2% ፣ በከፍተኛ ፍ/ቤት 77% ማድረስ ተችሏል በዚህም በይግባኝ የመርታት ምጣኔ በዳይሬክቶሬቱ በከፍተኛ መጠን ማሻሻል ያሳየ መሆኑ ተገልጧል፡፡

 

በተጠናቀቀዉ 2011 የበጀት አመት በሁሉም የምርመራ ጉዳዮች በማካሔድ የምርመራ ስራን በመምራት በሁሉም መዛግብት ውሳኔ ለመስጠት በታቀደ ቢሆንም፤ ምርመራ ተጣርቶባቸው ለዐቃቤ ህግ ከቀረቡ 1109 መዛግብት ውስጥ በከባድ፣ በመካከለኛና በቀላል ወንጀል ጉዳዮች በአጠቃላይ 1096 መዛግብት ዉሳኔ ያገኙ መሆናቸውን ገልፀዋል፡፡

 

ቅንጅታዊ አሰራርን በተመለከተም ከአዲስ አበባ ፖሊስ ኮሚሽን የምርመራ ስራን አስመልክቶ በተደረሠው የጋራ መግባባትም የምርመራ ስራ ተሳትፎ ውስንነትን፣ የማስረጃ አሰባሰብና ጥንቅርን፣ የምስክርና ተከሳሽ አቀራረብ እንዲሁም የበፈጣን ችሎት (RTD) ውሳኔ አሰጣጥ ችግሮች እና የክትትልና ድጋፍ እንዲሁም የግብአት አቅርቦትን አስመልክቶ በነበሩ ችግሮች ላይ በመመስረት የአሰራር አቅጣጫ በመቀመጡ በአዲስ አበባ ፖሊስ ኮሚሽን በምርመራ ስራ የሚሠሩ ዐቃቢያነ ህጐችን ቁጥር በመጨመር የምርመራ መምራት ተሳትፎ በፊት ከነበረው በተሻለ ደረጃ ማሳደግ መቻሉንና በዚህም በተወሰነ መልኩም የመዝገብ መዘግየትና የምርመራ ስራ ጥራት ውስንነት መቀነስ ተችሏል ሲሉ አብራርተዋል፡፡


  • 72789053_2539088209518581_1307138722050867200_o.jpg