Search

የ19 ዓመቷ ብራዚላዊት አደገኛ ዕጾችን በማዘዋወር ወንጀል ተይዛ በእስራት እና በገንዘብ ተቀጣች


23/10/2019

ብራዚል ሳኦፖሎ ነዋሪ የሆነችው ተከሳሽ ሚስ ላይላ ሞኒኪያ በፈፀመችው የተከለከሉ ዕጾችን ማዘዋወር ወንጀል ዐቃቤ ሕግ በመሰረተው ክስ በእስራት እና በገንዘብ መቀጮ ተቀጣች፡፡

 

ተከሳሽ የወንጀል ሕግ አንቀጽ 525 /1/ለ ስር የተደነገገውን በመተላለፍ ታህሳስ 07 ቀን 2011 ዓ.ም ከምሽቱ 2፡30 በሕግ እንዳይመረት፣ እንዳይዘዋወርና በጥቅም ላይ እንዳይውል የተከለከለውን አደገኛ ዕጽ የኢትዮጵያ አየር መንገድን በመጠቀም ከብራዚል ሳኦፖሎ በመነሳት ወደ ኢትዮጵያ ቦሌ አለም አቀፍ አውሮፕላን ማረፊያ በመምጣት ወደ ፓሪስ ጉዞ ለማድረግ በዝግጅት ላይ እያለች አየር ማረፊያ ውስጥ የፌዴራል ፖሊስ ወንጀል መከላከል ዘርፍ አደገኛ ዕጽ ዝውውር ቁጥጥር አባላት በተደረገ ፍተሻ በልብስ መያዣ ሻንጣ ክብደቱ 6500 (ስድስት ሺህ አምስት መቶ) ግራም የሚመዝን ኮኬይን እጽ አምስት እሽግ የተገኘባት በመሆኑ በፈፀመቺው መርዛማ እና አደገኛ ዕፅ ማዘዋወር ወንጀል ተከሳ ፍርድ ቤት መቅረቡን የክስ መዝገቡ ያስረዳል፡፡

 

ተከሳሽ ክሱን እንድትረዳዉ ከተደረገ በኃላ የእምነት ክህደት ቃሏን ስትጠየቅ ችግረኛ ስለሆንኩ ድርጊቱን ፈፅሜለሁ በማለት ጥፋተኝነቷን ለችሎቱ አስረድታለች፡፡ ዐቃቤ ሕግም ተከሳሽ ድርጊቷን ያመነች በመሆኑ የጥፋተኝነት ውሳኔ እንዲሰጥለት አመልክቷል፡፡

 

ፍርድ ቤቱም ግራ ቀኙን መርምሮ ተከሳሹን በተከሰሰችበት ክስ ጥፋተኛ ነሽ ብሏታል:: የፌዴራል ከፍተኛ ፍርድ ቤት ልደታ ምድብ 8ኛ ወንጀል ችሎት መዝገቡን መርምሮ ተከሳሽ ጥፋተኝነቷን ማመኗን፣ ሪከርድ የሌለበት እና እርጉዝ መሆኗን ማቅለያዎችን በመቀበል በ8 ዓመት ጽኑ እስራትና በ8 ሺ ብር የገንዘብ መቀጮ እንድትቀጣ የወሰነ ሲሆን ተከሳሽ በተሰጠው ውሳኔ ቅር በመሰኘት ይግባኝ በመጠየቋ የፌዴራሉ ጠቅላይ ፍርድ ቤት የይግባኝ መዝገቡን መርምሮ መስከረም 30 ቀን 2012 ዓ.ም በ6 ዓመት ከ6 ወር ጽኑ እስራት እና በ5000 ሺ ብር እንድትቀጣ ወስኗል፡፡


  • 73554699_2547658915328177_1637975169483931648_o.jpg