Search

ኢ-ሰብአዊ እና አዋራጅ አያያዞችን ለማስወገድ ኢትዮጵያ ተቀብላ ያፀደቀችውን የተ.መ.ድ. ስምምነት ሁለተኛና ሶስተኛ ወቅታዊ ረቂቅ ሪፖርት ለውይይት ቀረበ


26/11/2019

የኢ.ፌ.ዲ.ሪ ጠቅላይ ዐቃቤ ህግ በአዋጅ ቁጥር 943/2008 አገራችን የተቀበለችውን አለማቀፍና አህጉራዊ የሰብአዊ መብት ስምምነቶች አፈጻጻም በሚመለከት ወቅታዊ አገራዊ ሪፖርት አዘጋጅቶ እንዲያቀርብ በተሰጠው ተግባርና ኃላፊነት መሰረት፤ ኢትዮጵያ እንደ አውሮፕያኑ አቆጣጠር በ1994 ተቀብላ ያጸደቀችውን፤ ማሰቃየትና ሌሎች ጭካኔ የተሞላባቸው ኢ-ሰብአዊ አዋራጅ አያያዞችን ወይም ቅጣቶችን ለማስወገድ የተዘጋጀ ስምምነት ዙሪያ 2ተኛውን እና 3ተኛውን ወቅታዊ የአፈጻጸም ረቂቅ ሪፖርት አዘጋጅቷል፡፡

 

የተዘጋጀው ረቂቅ ሪፖርት ከፌዴራልና ከክልል መንግስታዊ ተቋማት እና መንግስታዊ ካልሆኑ ድርጀቶች ከተውጣጡ 70 ከሚሆኑ ባለድርሻ አካላት ጋር ዛሬ በቢሾፍቱ ከተማ ፒራሚድ ሪዞርት ውይይት እየተደረገበት ሲሆን በውይይት መድረኩ የመክፈቻ ንግግር ያደረጉት በጠቅላይ ዐቃቤ ህግ ረዳት ጠቅላይ ዐቃቤ ህግና የጠቅላይ ዐቃቤ ህጉ አማካሪ የሆኑት አቶ ፍርዴ ቸሩ እንደተናገሩት "ሀገራት የፈረሟቸውን ወይም የተቀበሏቸውን አለማቀፍና ቀጠናዊ የሰብአዊ መብት ስምምነቶች በሀገራቱ ላይ የሚጥሏቸውን ግዴታዎች አሉ፤ከነዚህም ግዴታዎች መካከል አንዱ በገቡት ቃል መሰረት ሰብአዊ መብቶችን መጠበቅና ስለ ስምምነቶቹ ሀገራዊ አተገባበር የመነሻ እና በየጊዜው የሚዘጋጀውን ወቅታዊ የአፈጻጸም ሪፖርት ማቅረብ ሲሆን የዛሬው መድረክ አላማም በሚቀርበው ረቂቅ ሪፖርት ላይ ተወያይተን ግብአት ለማሰባሰብ ነው ብለዋል፡፡

 

በጠቅላይ ዐቃቤ ህግ የሪፖርት ዝግጅት ቡድን አስተባባሪ የሆኑት አቶ ምስክር ታሪኩ ረቂቅ ሪፖርቱን በዝርዝር ለመድረኩ ተሳታፊዎች ያቀረቡ ሲሆን ፤ በሪፖርቱ ላይም አገራች የሰብአዊ መብት አያያዝን በተመለከተ 2010 እ.ኤ.አ ጀምሮ ያሏትን አፈጻጸም የነበሩ ክፍተቶችን በአፈጻጸሙ ወቅት ያጋጠሙ ችግሮችን እንዲሁም የተወሰዱ መፍትሔ ሀሳቦች ምን ምን እንደሆኑ መረጃዎችን ከፌዴራልና ከክልልና እንዲሁም መንግስታዊ እና መንግስታዊ ካልሆኑ አካላት በማሰባሰብ በዝርዝር ተካቷል፡፡

 

ኢትዮጵያ ስምምነቱን ተቀብላ ያጸደቀችው 1995G.C ቢሆንም የመጀመሪያ የአፈጻጸም ሪፖርቷን ግን ከ14 አመት በኋላ 2009 ዓ.ም ማቀረቧ የሚታወስ ሲሆን ሀገራቱ የተፈራረሙትን ስምምነት በየ 4 አመት ተኩል የማቅረብ ግዴታ እንዳለባቸውም ተገልጿል፡፡

 

ጠቅላይ ዐቃቤ ህግ ሪፖርቱን ቀጥተኛ ተሳትፎ ሊኖራቸው ይገባል ብሎ ካመነባቸው አካላት ጋር በመተባበር አዘጋጅቷል፡፡በመድረኩ ከተሳታፊዎች የተለያዩ ሀሳቦች እየተነሱ ሲሆን ውይይት ከተደረገባቸው በኋላ ግብአት ይሰባሰባል ተብሎ ይጠበቃል፡፡


  • 76644689_2618461494914585_1630552929125531648_n.png