Search

የፌዴራሉ ከፍተኛ ፍርድ ቤት 15ኛ የወንጀል ችሎት በእነ ክንፈ ዳኝው የክስ መዝገብ ላይ እንዲከራከሩ ብይኝ ሰጠ


29/11/2019

በነሜጀር ጀነራል ክንፈ ዳኝው የክስ መዝገብ በአዳማ እርሻ ኢንጅነሪነግ ኢንዱስትሪ ውስጥ ከትራክተሮችና የትራክተር አካላት ግዥ ጋር በተያያዘ በፈጸሙት የሙስና ወንጀል የቀረቡባቸውን 7 ክሶች እንዲከላከሉ የፌዴራል ከፍተኛ ፍርድ ቤት 15ኛ ወንጀል ችሎት ብይን ሰጠ፡፡

 

ተከሳሾች በብረታብረትና ኢንጅነሪነግ ኮርፖሬሽን(ሜቴክ) ስር የሚገኘውን የአዳማ እርሻ መሳሪያዎች ኢንጅነሪነግ ኢንዱስትሪ፤ ከ2003 ዓ.ም ጀምሮ ትራክተርና የትራክተር አካላት ግዥ ሲፈጽሙ በህግና በተቋሙ የግዥ መመሪያ መሰረት መፈጸም ሲገባቸው፤ ስልጣናቸውን ተገን በማድረግ ከህጋዊ አሰራር ውጭ ከተለያዩ የውጭ ሐገር ኩባንያዎችና የኩባንያዎቹ ወኪል ከሆኑት ኢትዮጵያውያን ደላሎች ጋር በጥቅም በመመሳጠር እንዲሁም ግዠዎች ከኢንዱስትሪው ፍላጎት ውጭ በቀጥታ በኃላፊዎች ተጽዕኖ እንዲፈጽሙ ትዕዛዝ ሰጥተዋል፡፡

 

በመሆኑም በአጠቃላይ ከ 7 የውጭ ሀገር ኩባንያዎች ከ14,000(ከአስራ አራት ሺ) በላይ ትራክተሮችን እና የትራክተር አካላትን 181,076,621 የአሜሪካ ዶላር 43,385,173.8 ዩሮ ወጭ በማድረግ ህገ-ወጥ ግዥ መፈጸማቸውን በዚህም ምክኒያት የሀገሪቱን የውጭ ምንዛሬ አለአግባብ እንዲባክን አድርገዋል፡፡

 

ከዚህም በተጨማሪ የተገዙት ትራክተሮች የጥራትና የቴክኒክ ችግር ያሉባቸው በመሆናቸው ከ6,000 በላይ ትራክተሮች ገዥ አጥተው በኢንዱስትሪው ግቢ ውስጥ ተከማችተው በፀሀይና በዝናብ እንዲበላሹ በመደረጉ በመንግሰት ላይ አሁን ባለው ደረጃ ወደ 300,000,000 ብር አካባቢ ጉዳት እንዲደርስ ማድረጋቸውን እንዲሁም በግዥ ሂደት የተሳተፉ የውጭ ሀገር ኩባንያዎች እና ሌሎችም ከፍተኛ ጥቅም እንዲያገኙ ማድረጋቸውን የአቃቤ ህግ የክስ መዝገብ ያስረዳል፡፡

 

ዐቃቤ ህግ 23 የሰው ምስክሮችን ፣19 የሰነድ ማስረጃዎችን ፣የኢሜል መልዕክት ልውውጦችን እንዲሁም የፎቶ ግራፍ ማስረጃዎችን በክስ መዝገብ ላይ አካቶ አቅርቧል፡፡

 

ፍርድ ቤቱም ዐቃቤ ህግ ያቀረባቸውን የሰውና የሰነድ ማስረጃዎች መርምሮ ሁሉንም ተከሳሾች የቀረቡባቸውን ክሶች እንዲከላከሉ በማለት በ12/03/2012 ዓ.ም ብይን ሰጥቷል፡፡

                      

በዚህም መሰረት ተከሳሾች አሉኝ የሚሏቸውን የመከላከያ ማስረጃዎች ከጥር 4/2012 ዓ.ም ጀምሮ አቅርበው ለፍርድ ቤቱ እንዲያሰሙ ትዕዛዝ ሰጥቷል፡፡


  • 78495077_2625382080889193_1970818586414940160_n.jpg