Search

በእቅድ መሰረት በመመራት የተመዘገቡ ውጤቶችን ትኩረት ሰጥቶ በመረጃ የመያዝ ተግባራት ተጠናክሮ ሊቀጥል እንደሚገባ ተገለፀ

Published: 43 days ago

                                                                                                                                                                                                                                                                                                                                                                                                                                                                                        የኢ.ፌ.ዲ.ሪ ጠቅላይ ዐቃቤ ህግ የተጠሪ ተቋማትን የ2012 በጀት አመት የሩብ አመት የስራ አፈፃፀም ሪፖርት በዛሬዉ እለት የገመገመ ሲሆን በዚሁ የግምገማ መድረክ ላይ ጠቅላይ ዐቃቤ ህጉ ክቡር አቶ ብርሃኑ ፀጋዬ ተጠሪ ተቋማቱ በእቅድ መሰረት ስራዎችን ለመስራት ያደረጉት ጥረትና በተለይም የተገኘዉና የተመዘገበዉ ዉጤት ምንድን ነዉ የሚሉ ተግባራትን ትኩረት ሰጥቶ በመረጃ የመያዝ ተግባራቸዉ የተሻለ መሆኑን አንስተዉ ይህ ተግባር ተጠናክሮ ሊቀጥል እንደሚገባ ገልፀዋል፡፡

 

በግምገማ መድረኩ የፌዴራል ሰነዶች ማረጋገጫና ምዝገባ ኤጀንሲ ዋነኛ ተግባር በሆነዉ ሰነድ በማረጋገጥና የመመዝገብ አገልግሎት ጋር በተያያዘ 34.742 ማህበራት ሰነዶች የመመስረቻና መተዳደሪያ ደንቦች መመርመርና መመዝገብ እቅድ ተይዞ 227.034 ማህበራት መመዝገብ መቻሉ የተገለጸ ሲሆን ከእቅድ በላይ የመሰራቱ ምክንያትም ባለፉት ወራት ለወጣቶች ከተፈጠረዉ የስራ እድል ጋር በተያያዘ በርካታ ወጣቶች ይደራጁ ስለነበር መሆኑ ተገልጧል፡፡

 

የኢፌዴሪ ሲቪል ማህበረሰብ ድርጅቶች ኤጀንሲ በበኩሉ የሲቪል ማህበረሰብን ድርጅቶችን በመመዝገብ ፍቃድ በመስጠት የመደራጀት መብትን እንዲረጋገጥ ለማድረግ 260 ድርጅቶችን ለመመዝገብ አቅዶ 276 ድርጅቶች ለመመዝገብ የተቻለ መሆኑ የተገለፀ ሲሆን የድርጅቶችን ዳግም ምዝገባ በተመለከተም እስካሁን 1379 ድርጅቶች ብቻ መመዝገባቸዉ ገልፆ ከዚሁ ጋር ተያይዞ በዳግም ምዝገባ ያልተመዘገቡ ድርጅቶች ተገኝተዉ መመዝገብ እንደሚገባቸዉን የምዝገባ ሂደቱም መጋቢት 3/2012 የሚጠናቀቅ መሆኑ ተጠቁሟል፡፡

 

በቀረቡ ሪፖርቶች ላይ በርካታ አስተያየቶችና ጥያቄዎች ተነስተዉ በሀላፊዎቻቸዉ አማካኝነት ምላሽ ያገኙ ሲሆን በኢ.ፌ.ዲ.ሪ ጠቅላይ ዐቃቤ ህግ ምክትል ጠቅላይ ዐቃቤ ህግ በሆኑት በዶክተር ጌዲዮን ጢሞቲዎስ አማካኝነት የጋራ ጉዳዮችና የቀጣይ የትኩረት አቅጣጫዎች ለተጠሪ ተቋማቱ ተሰጥተዋል፡፡

 

የፌዴራል የፍትህና የህግ ምርምር እና ስልጠና ኢንስቲትዩት፣ የሰነዶች ማረጋገጫና ምዝገባ ኤጀንሲ፣የፌዴራል ማረሚያ ቤቶች አስተዳደር፣የፌዴራል ታክስ ይግባኝ ኮሚሽን፣የኢትዮጵያ አእምሯዊ ንብረት ፅ/ቤትና የኢፌዴሪ ሲቪል ማህበረሰብ ድርጅቶች ኤጀንሲ የኢፌዲሪ ጠቅላይ ዐቃቤ ህግ ተጠሪ ተቋማት መሆናቸዉ ይታወሳል፡፡

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                   


###

78602630_2641234405970627_505667600932405248_o.jpg  78597806_2641234362637298_2247895078527827968_o.jpg