Search

ከሴቶችንና አካል ጉዳተኞች ጥቃት ጋር በተያይዘ የግንዛቤ ማስጨበጫ ስልጠና ተሰጠ

Published: 94 days ago

በኢፌዴሪ ጠቅላይ ዐቃቤ ሕግ የአቃቂ ቃሊቲ ምድብ ጽ/ቤት የሴቶችንና የአካል ጉዳተኞችን ጥቃት ለመከላከል ከተለያዩ ትምህርት ቤቶች ለመጡ ተማሪዎችና የህብረተስብ ክፍሎች በሕግ ጉዳዮች ዙሪያ የግንዛቤ ማስጨበጫ ስልጠና ተሰጠ፡፡

 

የአቃቂ ቃሊቲ ምድብ ጽ/ቤት የሴቶች እና ህፃናት ፎካል ፐርሰን የሆኑት ዐቃቤ ሕግ እመቤት ኃይሌ የመክፈቻ ንግግር ባደረጉበት ወቅት እንደተናገሩት ጠቅላይ ዐቃቤ ሕግ ተቋም ከሚሰራቸው ስራዎች መካከል ለማህብረተሰቡ የንቃተ ሕግ ትምህርት መስጠት አንዱ መሆኑን የገልጸው ህፃናትና ወጣቶች የነገው ሀገር ተረካቢ እንደመሆናቸው መጠን በተለየ እንክብካቤ እና ፍቅር ልንይዛቸው፣ ከሚደርስባቸው ጥቃት ልንጠብቃቸው እንደሚገባ ተናግረዋል፡፡

 

ስልጠናውን የሰጡት ዐቃቤ ሕግ ሲመሌ ጉተማ እንደገለፁት ሴቶችና ህፃናት እንደ ሀገሪቱ ተጨባጭ ሁኔታ ለተለያዩ በደሎች እና ጥቃቶች የሚጋለጡ ሲሆን በተለይ ሴት ህፃናት ከወንድ ህፃናት በበለጠ ለሰው ሰራሽና የተፈጥሮ አደጋዎች የተጋለጡ መሆናቸውን ጠቁመው በጥቃቱ ምክንያት ለአካላዊ፣ አእምሯዊ፣ ለስነ ልቦናዊ፣ ማህበራዊ እና ኢኮኖሚያዊ ጉዳቶች ይዳረጋሉ ብለዋል፡፡

 

ስለጥቃት ምንነት፣ ጥቃት አድራሾች እና የጥቃት አይነቶች ላይ ማብራሪያ የሰጡት ዐቃቤ ሕጉ ወሲባዊ ጥቃት፣ የወሲብ ንግድ፣ አስገድዶ መድፈር፣ ግብረሰዶም በሀገራችን የወንጀል ሕግ በእድሜ፣ በሚኖር ግንኙነትና በአፈጻጸሙ ሁኔታ በተለያዩ የድንጋጌዎች ስር የተለያዩ ቅጣቶችን የሚያስቀጣ መሆኑን አስረድተዋል፡፡

በሌላ በኩል ዐቃቤ ሕግ አቤል አበበ የአካል ጉዳተኞችን መብትና የሕግ ጽንሰ ሀሳቦች ዙሪያ ስልጠና የሰጡ ሲሆን አካል ጉዳተኝነት በተፈጥሮ ወይም ከመወለድ በኋላ ሊከሰት የሚችል ክስተት መሆኑን ጠቁመው ማንኛውም የህብረተሰብ ክፍል በማንኛውም ጊዜ ተጋላጭ ስለሚሆን በእያንዳንዱ ቤተሰብ ውስጥ አካል ጉዳተኛ ሊኖር ስለሚችል የአካል ጉዳተኞች ጉዳይ የሁሉም ህብረተሰብ ጉዳይ መሆኑን ገልፀዋል፡፡

 

አቶ አቤል አበበ አክለውም ከሕግ አንፃር አድሎአዊ አሰራሮችን እና አካሄዶችን የሚያስቀሩ አለማቀፍና ሀገራዊ ህጎችን አብራርተው በኢትዮጵያ ህንፃ አዋጅ ቁጥር 624/11 ህንፃዎች ሲሰሩ አካል ጉዳተኞችን ከግንዛቤ ማስገባት እንደሚገባቸው እና በወንጀል ሕግ አንቀጽ 84 /1/ሠ ስር አንድ ወንጀል በአካል ጉዳተኛ ላይ ቢፈፀም ከብዶ የሚወሰን መሆኑን አብራርተዋል፡፡


###

81008957_2702345326526201_2459226161188700160_n.jpg