Search

የቴልኮም ማጭበርበር ወንጀል የፈፀመው ተከሳሽ በጽኑ እስራት ተቀጣ

Published: 66 days ago

ተከሳሽ ምንያህል ዋጋው የተባለ ግለስብ የቴሌኮም አገልግሎት ለመስጠት የሚያስችል ሕጋዊ ፈቃድ ሳይኖረው በህገ-ወጥ መንገድ ዓለም አቀፍ ጥሪ በማስተላለፍ የኢትዮ ቴሌኮምን ከ5 ሚሊዮን ብር በላይ እንዲያጣ በማድረጉ በፈፀመው ወንጀል በጽኑ እስራትና በገንዘብ ተቀጣ፡፡

 

ተከሳሽ የቴሌኮም መሳሪያዎችን ወደ ሀገር ዉስጥ ለማስገባት፣ ለመጠቀም እና የቴሌኮም አገልግሎት ለመስጠት የሚያስችል ሕጋዊ ፈቃድ ሳይኖረው በቦሌ ክፍለ ከተማ ወረዳ 02 ከግለሰብ ቤት በመከራየት የኮል ተርሚኔሽን፣ የኮል ባክ፣ ጥሪ የመቀበል እና ጥሪ የመላክ አገልግሎት መስጠት የሚችሉትን 1ኛ የኢትዮ ቴሌኮም ሲም ካርዶችን በውስጣቸው በማስገባት በአንድ ጊዜ ብዛት ያላቸው ጥሪዎችን በቅናሽ ማስተላለፍ የሚችሉ ብዛታቸው 07 የሆኑ ጌት ዌይ የስልክ መደወያ እና 11 ቲፒ ሊንክ የሚባል የቴሌኮም መሳሪያዎችን በመጠቀም የቴሌኮም አገልግሎት በመስጠት ከመጋቢት 30 ቀን 2010 እስከ ጷጉሜ 01 ቀን 2010 ዓ.ም ባለው ጊዜ 970፣107፣24 ደቂቃ ከውጭ ሀገር ወደ ኢትዮጵያ አለም አቀፍ የስልክ ጥሪዎችን በማስተላለፍ ኢትዮ ቴሌኮም ያገኝ የነበረዉን 184,320.37 ዶላር ወይም 5,082,007.66 ብር እንዲያጣ በማድረጉ በቴሌኮም ማጭበርበር አዋጅ ቁጥር 761/2004 አንቀፅ 9 (1ለ) ስር የተመለከተውን የወንጀል ድርጊት በመተላለፍ የተከሰሰ መሆኑን የዐቃቤ ሕግ የክስ መዝገብ ያስረዳል፡፡

 

ዐቃቤ ሕግ ተከሳሽ በፈፀመው ወንጀል ተጠያቂ እንዲሆን የሰው ምስክሮች፣ የሰነድ እና የኢግዚቢት ማስረጃዎችን ለፍርድ ቤቱ በማቅረብ ተከራክሯል፡፡

የፌዴራሉ ከፍተኛ ፍርድ ቤት ልደታ ምድብ 12ኛ የወንጀል ችሎት መዝገቡን መርምሮ ተከሳሽን በፈፀመው ወንጀል ጥፋተኛ በማለት በ9 ዓመት ጽኑ እስራትና በ45 ሺ ብር የገንዘብ መቀጮ እንዲቀጣ ሲል ወስኗል፡፡


###

83940730_2757557324338334_7736682554886979584_n.jpg